BOBONARU, 15 Fevereiru 2026 (TATOLI)-Estrada ligasaun husi postu administrativu Maliana bá postu Bobonaru, munisípiu Bobonaru, ameasadu kotu iha área Hali-Mesak, suku Odomau.
Justino Leto, nu’udar rezidente haktuir katak estrada no ponte ne’e falta de’it metru rua atu kotu, tanba kauza husi rai-monu hafoin akontese udan boot akontese horisehik sábadu, loron 14 Fevereiru.
“Agora hela rohan, fatin karreta ida nia de’it. Ita hasoru malu labele, tanba rai iha kraik ne’e monu hotu tiha, bee-dalan ponte nian ida iha okos ne’e mós monu, udan mai tan karreta tula todan liu bele monu hotu”, nia informa ba Tatoli, ohin.
Notísia relevante: Estrada ligasaun Bobonaru-Zumalai no Atsabe ameasada kotu
Justino salienta katak ponte ne’e iha tinan rua liubá empreza lokál Bier Amor Unipessol Lda., mak konstrui provizoriamente no obra ne’e to’o agora laiha kontinuidade
“Sira mai halo ponte foun ne’e mak sobu tiha kalen boot rua tau ponte okos ne’e. Depois tau fali gorong-gorong ki’ik ne’e, más projetu ne’e la la’o, agora paradu, ponte ne’e mós seidauk uza. Ponte ida sementara ne’e penahan laiha, udan mai rai monu hotu ba kraik hanesan agora ne’e”, nia relata.
Motorista kamioneta, Vitorino Gomes, husu ba Governu atu halo intervensaun imediata, tanba ne’e bele fó ameasa ba ema nia vida.
“Ami senti vida ameasadu loos, tanba rai-ninin ne’e nakfera hotu ona. AAmi liu ne’e obriga an de’it ona, se la mai normaliza lalais, ohin ho aban udan maka’as estrada kotu totál. Automatikamente, movimentasaun karreta ho motór paradu tanba laiha tan dalan alternativu atu bá Maliana, Bobonaru ho Lolotoe”, katak.
Lembra katak projetu manutensaun estrada no ponte ne’e hahú iha 2017 ho karáter emerjénsia ne’ebé responsabiliza husi Bier Amor Unipessoal Limitada ho totál kustu $2.060.737,42, maibé to’o agora laiha progresu no paradu hela tanba Ministériu Obra Públika halo intervensaun.
Notísia relevante: Komunidade preokupa projetu manutensaun estrada Maliana-Bobonaro
Jornalista: Sergio da Cruz
Editora: Maria Auxiliadora
