BOBONARU, 10 Dezembru 2025 (TATOLI)-Estrada liga postu administrativu Bobonaru Vila, munisípiu Bobonaru, bá postu Zumalai, munisípiu Kovalima, no postu Atsabe, munisípiu Ermera, ameasada kotu iha aldeia Taimea, suku Mali-Lait.
Estrada ne’e ameasadu kotu tanba kauza husi rai-halai, hafoin akontese udan-boot iha loron 08 to’o 09 fulan ne’e.
Xefe suku Male-Ubu, Quintiliano Barros, husu ba Ministeriu Obra Públika atu orienta Institutu Jestaun Ekipamentu no Apoiu Dezenvolvimentu Infraestrura (IGEADI) atu halo intervensaun imediata, tanba estrada ne’e liga munisípiu rua seluk.
Notísia relevante: Komunidade husu ba MOP suspensaun projetu manutensaun estrada Maliana-Bobonaru
“Se orsida mak udan tun tan ne’e bele monu ona, tanba ne’e ami autoridade lokál ne’ebé asesu mós dalan ne’e sente preokupadu, tanba estrada ne’e kotu difikulta ami suku neen nia viajen husi postu bá munisípiu”, nia informa ba jornalista sira, ohin.
Administradór Postu Administrativu Bobonaru, Tomás Barreto Henriques, rekoñese katak presiza toma atensaun urjente, nune’e sei hato’o proposta ba Prezidente Autoridade Munisípiu Bobonaru hodi ekamiña ba Ministériu Obra Públika atu konsidera.
“Dalan ida-ne’e estrada protokolu. Ha’u-nia komunidade durante ne’e terus loos atu lori sira nia produtu bá merkadu”, nia hato’o.
Tomás Henriques relata mós katak, tuir informasaun ne’ebe autoridade postu asesu husi Ministériu Obra Públika, estraga liga husi suku Oe-leu ba to’o Fatuletu tama ona iha faze konkursu públiku.
“Kompaña sira hahú ona submete dukumentu. Ha’u hanesan administradór postu esforsu mak ne’e ona, husu ba ita-nia komunidade atu hein ho pasiénsia, tanba estrada iha Timór laran la’ós iha Bobonaru de’it mak aat”, nia salienta.
Tuir observasaun jornalista Tatoli, tranporte públiku no privada kontinua sirkula iha estrada ne’e, maibé labele hasoru malu tanba hela de’it ona espasu ba karreta ida nia.
Notísia relevante: Komunidade husu MOP reabilita ponte-estrada rurál iha Bobonaru
Jornalista: Sergio da Cruz
Editora: Maria Auxiliadora
