BOBONARU, 08 Outubru 2025 (TATOLI) – Komunidade lokál husu ba Ministériu Obra Públika (MOP) suspensaun projetu manutensaun estrada no ponte ne’ebé liga área Bupira, suku Lahomea, postu administrativu Maliana, bá postu administrativu Bobonaru, tanba dezde tinan 2017 seidauk finaliza tanba serbisu paradu.
Iha tinan kotuk, Ministru Obra Públika, Samuel Marçal, deside hapara serbisu atu revee dezeñu no kuadru kuantidade (BoQ, sigla inglés), tanba falta koordenasaun di’ak entre empreza no Governu.
Fidélio Lopes de Jesus Afonso, rezidente iha Malian, espresa nia tristeza, konsidera katak projetu ne’e karáter emerjénsia, más nafatin laiha progresu iha tinan ualu-resin.
“Ami husu ba Governu di’ak liu hapara tiha projetu ne’e, tanba tinan barak ona estrada husi Maliana ba Bobonaru iha tempu udan ema sempre preokupa. Depois ponte ida kompañia halo iha parte Hali-mesak nia sorin ne’e mós to’o agora seidauk uza. Serbisu para tinan ida-resin ona la la’o”, nia informa ba Tatoli, iha Maliana.
Membru komunidade seluk, Rudolfo Pereira, defende katak Governu presiza implementa projetu foun, maski projetu anteriór ne’e gasta orsamentu boot, maibé la hatudu mudansa signifikativa.
“Estrada Maliana Bobonaru ne’e tinan 2023 ne’e viral, tanba parte Galusapulu ne’e kotu, Obras Publika mak mai hadi’a fali. Foin lalais ne’e mós hetan estragus, IGE mak normaliza, ami bele liu ho di’ak, más ami la hare kompañia ida kaer projetu ne’e halo estrada di’ak, tanba dehan hadi’a más estrada aat nafatin. Ne’e ita gasta de’it osan, tanba sá la hapara tiha, hein projetu foun de’it mak halo dala ida deit ona”, nia hato’o.
Iha sorin seluk, Koordenadór Infestrutura Ministériu Obra Públika Bobonaru, Fernando de Fátima, haktuir katak, antes ne’e, sira-nia parte hato’o ona karta ba Gabinete Ministru Obra Públika atu hapara projetu ne’e, tanba atividade iha terrenu paradu totál.
“Iha ne’ebá Ministru mós atu foti desizaun katak projetu ida-ne’e tenke hapara ona tanba ita atu halo konstrusaun foun iha ne’ebá”, nia haktuir
Enjeñeiru ne’e konfirma katak projetu reabilitasaun estrada husi diresaun Santa Krús bá suku Oe-leu iha hela faze Dezeñu Enjeñaria Detalladu (DED). Enkuantu pakote ida husi Oe-leu bá Lourba to’o postu administrativu Atsabe, munisípiu Ermera, prosesa iha Komisaun Nasionál Aprovizionamentu.
Projetu manutensaun ponte no estrada ne’e responsabliza husi empreza lokál Vieramor Unip. Lda. ho montante millaun $2.
Notísia relevante: Komunidade solisita ba MOP aselera reabilitasaun estrada Maliana bá Bobonaru
Jornalista: Sergio da Cruz
Editora: Maria Auxiliadora
