BOBONARU, 16 Setembru 2025 (TATOLI) – Populasaun sira husu ba Governu, liuhusi Ministériu Obra Públika (MOP) atu aselera prosesu reabilitasaun estrada husi Maliana Vila bá postu administrativu Bobonaru, munisípiu Bobonaru.
Alfredo Moniz Pacheco, nu’udar komunidade preokupa tinan barak ona ho kondisaun estrada atuál ne’ebé nesesita duni atu hetan atensaun
Nia dehan, foin lalais, ekipa Institutu Jestaun Ekipamentu no Apoiu Dezenvolvimentu Infraestrurura, Institutu Públiku (IGEADI, I.P) halo ona normalizasaun ba estrada hodi fasilita movimentu transporte públiku iha bailoron. Maibé, agora besik tama ba tempu udan kondisaun sei sai piór tanba taho maka’as, estrada laran nakonu ho bee, ne’ebé difikulta tebes movimentu.
“Estrada husi Maliana mai Bobonaru sei kontinua aat, ami ezije Ministériu Obra Publika atu aselera ninia prosesu, [tanba] hodi bainhira sukat tiha ona”, nia hato’o ba Tatoli iha Ilibole, Bobonaru, ohin.
Nune’e mós Santina de Jesus Afonso dehan durante tinan barak ona estrada referida sai preokupasaun, liuliu iha tempu udan hodi difikulta tebes povu agrikultór atu lori sira-nia produtu asesu bá merkadu.
Aleinde ne’e, sente izoladu tanba kondisaun estrada ladi’ak atu fasilita sirkulasaun sidadaun sira-nian.
Administradór postu administrativu Bobonaru, Tomás Henriques Barreto, haktuir nia parte konfirma ona ho MOP katak foin lalais finaliza ona planta no kadernu enkargu (BoQ, sigla inglés). “Agora, hein tama faze verifikasaun, ita espera iha tempu badak sira sei mai”, dehan.
Lembra katak, iha Maiu 2025, ekipa téknika MOP halo ona levantamentu dadus topografia hahú husi merkadu Asudai, suku Ilat-Laun, postu Bobonaru, to’o Santa Krús Maliana ho distánsia kilómetru 18.
Jeografikamente, Bobonaru mak munisípiu ida husi Timor-Leste, lokaliza iha parte oeste, ne’ebé halo fronteira ho munisípiu Ermera ho Ainaru (oeste), Kovalima (súl), Indonézia (oeste) no Likísa (norte).
Munisípiu ne’e iha postu administrativa neen – Atabae, Balibó, Bobonaru, Kailaku, Lolotoe no Maliana, no iha suku 50. Demográfikamente, munisípiu ne’e iha totál populasaun hamutuk 99,956 (projesaun 2019) no densidade populasaun mak 72,38 ba área 1,380.82 km2. Grupu populasaun ida-ne’e, ko’alia lia-tetun, bunak no kemak.
Munisípu Bobonaru iha poténsia setór turizmu hanesan bee-manas iha Marobo, tasi-ibun Atabae, ponte portugés iha Balibó, ai-laran lulik iha Balibó, foho Loelaku, mota Picigi iha Lolotoe, poténsia natar no seluk tan. Postu Bobonaru iha suku 18.
Notísia relevante: MOP halo levantamentu dadus topografia estrada Maliana-Bobonaru
Jornalista: Sergio da Cruz
Editora: Maria Auxiliadora
