BOBONARU, 13 Maiu 2025 (TATOLI)—Ministériu Obra Públika (MOP) liuhusi diresaun Jerál Planeamentu, tersa ne’e, halo levantamentu dadus topografia ba estrada hahú husi kruzamentu tolu merkadu Asudai Marobo, suku Ilat-laun, postu administrativu Bobonaru ba to’o iha área Santa Krús, suku Lahomea, postu administrativu Maliana, munisípiu Bobonaru ho totál distánsia hamutuk kilómetru 18.
Notísia Relevante: Administradór hato’o preokupasaun problema Estrada Maliana-Bobonaro ba MOP
“Aban sei kontinua, dalaruma bainrua ou baintolu hanesan ne’e bele to’o iha Santa Krús Maliana. Husi dadus topografia ne’e para ita atu bele hatene diferensa medida rai sira-ne’e, nune’e ita atu hatene katak alargamentu afetadu ne’e bele to’o iha ne’ebé. Ita atu alarga to’o hira. Antes ami atu la’o ne’e, ami la’o ho dadus prelimináriu liga direta ho dadus topografia ara atu hatene risku ne’ebé iha, atu mudansa rai-halai sira-ne’e ami bele hatene ninia pozisaun sira iha ne’ebé ami diretaidentifika kedas,” Primeiru Vise Koordenadór Unidade Jestaun Projetu Resposta Rapidas MOP, Leão Freitas Guterres, informa ba Agência Tatoli iha Pintu Gerbang ka Odamatan Boot Odomau.
Dadus topográfiku importante tebes tanba ida-ne’e fó imajen ida-ne’ebé loos kona-ba forma husi superfíse rai nian, no informasaun ida-ne’e útil tebes iha área oioin hahú husi planeamentu dezenvolvimentu, mitigasaun ba dezastre, to’o jestaun rekursu naturál sira.
Dadus topográfiku ajuda iha planeamentu dezenvolvimentu infraestrutura, hanesan estrada, ponte no edifísiu sira, hodi konsidera kondisaun inklinasaun, gradiente no risku potensiál sira husi dezastre naturál sira hanesan inundasaun ka rai-halai.
Nia konfirma, prosesu levantamentu hahú husi Marobo to’o área Hali-Mesak no Galisapulu ne’ebé atinje ona kilómetru hitu (7).
Leão sublińa, hafoin konklui levantamentu dadus topografia, ekipa sira sei kontinua elebora dadus hatama ba mapa hodi prosesu dezeñu.
“Antes ne’e ami sei halo karta ba laboratóriu, sira sei mai DSP tiha fali, rezultadu husi laboratóriu iha mak ami foin bele hatene ninia-mahar husi alkatraun ne’e atu hira-hira, mak ami foin bele implementa ida-ne’e,” nia hateten.
Komunidade Bobonaru, Delfín Antonio Perreira, husu ba Ministériu Obra Públika atu aselera prosesu tomak nune’e bele implementa projetu molok mandatu Governu Konstitusionál da-saia (IX) ramata.
“Ami povu hakarak tinan ida ka rua hanesan halo ona, tanba ami hein estrada ida-ne’e tinan 20-resin ona. Balun iha tempu kampaña dehan atu besik halo ona, maibé to’o ohin loron saida mak akontese, afinál dezeñu de’it mós sei laiha, foin mak mai sukat para atu bá halo dezeñu. Maibé, ami fiar katak Ministru foun ida-ne’e halo duni, se lae, ida foun mai haruka sukat fila-fali, ne’e bele dada-tan to’o la halo de’it ona,” nia dehan.
Aleinde ne’e, komunidade Inacio Maia de Jesus refors, Governu presiza iha seriedade rezolve estrada ne’e tanba kada tinan IGEADI, I.P mak mai ateru no hadi’a hotu tiha hafoin udan mai sobu fila-fali no depois hadia fali.
“Ida-ne’e ita gasta osan de’it. Ami husu ba Governu tau prioridade iha 2026 para 2027 ba halo reablitasaun ona, tanba estrada ne’e liga husi kapitál Maliana ba postu administrativu Bobonaru ho Lolotoe no munisípiu Ermera ho Kavalima. Loro-loron ne’e movimentu maka’as, maibé kuitadu tempu udan difikulta tebes tranporte públiku no privadu, tanba bee-nakonu no dalan monu no taho mak nakonu,” Nia dehan.
Tuir Agência Tatoli nia observasaun nota katak, dadaun ne’e ekipa Institutu Apoia Dezenvolvimentu Infrastrutura, Institutu Públiku (IGEADI, I.P) Brigada Maria-Tapo halo hela normalizasaun hahú husi suku Oe-leu ba to’o Kapitál Maliana hodi fasilita movimentasaun públiku.
Enkuantu estrada ne’e iha tinan 2017 ne’e, Ministériu Obra Públika, Transporte no Komunikasaun, kontrata kompañia lokál Vieramor Unipesoál, Lda, hodi halo manutensaun estrada no ponte ho kustu millaun $2,060,737.42, maibé projetu ho karáter emerjénsía ne’e to’o agora seidauk finaliza no paradu hela tanba Governu sei halo fali revizaun ba dezeñu no Bill Off Quantitative (BoQ).
Notísia Relevante: Autoridade lokál preokupa bee nalihun iha estrada ligasaun Maliana-Bobonaro
Jornalista : Sergio da Cruz
Editór : Cancio Ximenes
