BOBONARO, 06 fevereiru 2025 (TATOLI)—Xefe suku sira triste no preokupa ho kondisaun estrada liga husi kapitál Maliana ba postu administrativu Bobonaro inklui Loloto’e tanba daudaun ne’e bee nalihun nakonu iha Estrada klaran hodi difikulta movimentasaun públiku.
Xefe suku Oeleu, postu administrativu Bobonaro, Januario Meta-Tae Bragança, hateten kondisaun fiziku estrada ne’e grave, tanba konstrui dezde okupasaun Indonezia to’o ágora Governu seidauk tau matan.
Notísia Relevante : MOP presiza aselera revizaun dezeñu ba manutensaun estrada Lahomea-Bobonaro
“Ita haree estrada ne’e la’ós hanesan estrada ona, ita la’o iha mota-laran de’it, hanesan kolaa ita husik ikan iha laran. Ha’u husu ba Ministériu Obra Públika atu lori tékniku sira tun mai terrenu hodi haree direta ho matan saida mak povu Bobonaro hasoru,” nia hateten ba jornalista sira iha Malilait, kinta ne’e.
Xefe suku Lourba, postu administrativu Bobonaro, Lino de Jesús, hateten problema ne’e hato’o beibeik ona no governante sira mós haree rasik ho matan, maibé to’o agora problema ne’e seidauk bele resolve to’o ohin loron.
“Ami hakarak ezije ba Governu presiza tau-matan ba estrada hahú husi kapitál munisípiu to’o postu Bobonaro no ba tan Atsabe, munisípiu Ermera no postu Zumali, munisípiu Covalima tanba kondisaun estrada ne’e grave loos ona. Ita halo viajen ho motorizada ne’e hanesan la’o hela iha mota laran ne’e,” nia dehan.
Aleinde ne’e Xefe suku Mali-Ubu, Quintiliano Barros Fernandes, lamenta tanba dezde Timor-Leste ukun-aan to’o agora daudaun ne’e Governu bele troka malu maibé kondisaun estrada ne’e laiha mudansa, no ida-ne’e afeta ba setór hotu-hotu liuliu saúde no agrikultura.
“Iha setór agrikultura, povu bele iha ninia produtu lokál maibé la folin tanba estrada públiku ligasaun ba kapitál munisípiu ladi’ak. Ita liga ba saúde, urjentemente inan-feton balun atu partus dalaruma nia tenke lakon vida, tanba kondisaun estrada ladi’ak. Iha ne’e Sentru Saúde rua, sira transporta pasiente husi ne’e molok to’o ospitál referál Maliana dalaruma labele salva tanba Estrada aat,” nia hateten.
Entretantu, estrada ne’ebé aat ne’e ligasaun ba postu administrativu Atsabe, munisípiu Ermera no postu administrativu Zumalai, munisípiu Covalima.
Tuir dadus, postu administrativu Bobonaro iha suku 18 no aldeia 63 ho totál populasaun hamutuk 10,347 no postu administrativu Loloto’e iha suku hitu (7) no aldeia 20 ho totál populasaun hamutuk 7,695.
Notísia Relevante: Estrada iha Oe-leu haterus komunidade viajen Maliana-Bobonaro
Jornalista : Sergio da Cruz
Editór : Cancio Ximenes
