BOBONARO, 16 jullu 2024 (TATOLI) – Komunidade sira husu Ministériu Obra Públika (MOP) atu aselera revizaun ba dezeñu projetu manutensaun estrada husi diresaun suku Lahomea, postu administrativu Maliana ba postu administrativu Bobonaro, munisípiu Bobonaro.
Komunidade postu administrativu Bobonaro, Filomeno de Jesus Lopes, konkorda ho desizaun governu, maibé tuir nia presiza aselera ninia prosesu tanba projetu ne’e implementa dezde tinan 2017 to’o agora seidauk finaliza.
Enkuantu Ministru Obras Públika, Samuel Marçal, deside hadi’ak dezeñu ba projetu ne’e atu garante obra ne’e hatudu kualidade di’ak no dura ba tempu naruk, tanba kompañia implementa projetu ne’e laiha koordenasaun ho Governu.
Notísia relevante: MOP deside hadi’a dezeñu projetu manutensaun estrada Lahomea-Bobonaro
“Ami foin lalais akompaña iha televizaun ministru dehan sei halo revizaun fali ba ninia dezeñu, tuir ha’u-nia hanoin ida ne’e di’ak, tanba estrada ne’ebé hadi’ak moos aat fali, ne’ebé agora ami presiza hadi’a dezeñu ne’e lalais oituan, tanba la kleur tán udan araska ona, ne’e sei afeta ba kompañia atu aselera serbisu, entaun projetu ne’e tinan-tinan nune’e hela de’it,” nia informa ba Tatoli iha Hali-Mesak, tersa ne’e.
Felix Monteiro nu’udar motorista rekomenda bainhira konklui revizaun ba dezeñu, ekipa MOP mós tenke halo kontrolu rútina tanba implementasaun projetu ne’e la’o tarde liu.
“Estrada ida-ne’e kompañia hadi’ak tinan ualu ona, mas ami la’o ba mai haree estrada ne’e nafatin de’it, ita la hatene hadi’ak ne’e iha ne’ebé, tanba realidade sai husi Lahomea to’o ba Oeleu ne’e kuak barak, ida-ne’e governu mak la kontrola ka kompañia mak serbisu laloos,” nia preokupa.
Nia fó hanoin ba Ministériu Obra Públika atu tau prioridade halo reabilitasaun tanba manutensaun de’it daudaun natoon atu fasilita movimentasaun transporte públiku no privada.
“Estrada ne’e halo dezde tempu Indonézia, agora ita haree realidade ninia fíziku ne’e estragus hotu ona, iha tempu udan ami halo viajen ba mai araska loos,” nia hateten.
Tuir Observasaun Ajeésia TATOLI iha terrenu tersa ne’e nota katak ekipamentu pezadu no materiál seluk kompañia nia iha hela terrenu.
Enkuantu obra ne’e responsabiliza husi kompañia Vieramor Unipesoál Lda ho kustu millaun rua-resin ($2.060.737,42).
Notísia relevante: Komunidade preokupa kondisaun Ponte Ili-Bole ligasaun Bobonaro-Maliana
Jornalista: Sérgio da Cruz
Editór: Evaristo Soares Martins
