iklan

EKONOMIA, BOBONARO, HEADLINE, MUNISÍPIU

MOP deside hadi’a dezeñu projetu manutensaun estrada Lahomea-Bobonaro

MOP deside hadi’a dezeñu projetu manutensaun estrada Lahomea-Bobonaro

Projetu emerjénsia manutensaun estrada no ponte iha área Hali-Mesak, aldeia Anahun, suku Odomau, postu administrativu Maliana ne'ebé ligasaun husi Lahomea ba postu administrativu Bobonaro. Imajen Tatoli/Sérgio da Cruz.

BOBONARO, 04 jullu 2024 (TATOLI) –  Ministru Obra Públika, Samuel Marçal, deside hadi’a dezeñu ba projetu manutensaun estrada diresaun suku Lahomea ba postu administrativu Bobonaro, tanba sei haree didi’ak projetu refere nune’e dura ba tempu naruk.

Ministru Obras Públika, Samuel Marçal, esplika, razaun governu deside halo mudansa dezeñu tanba kompañia implementa projetu ne’e laiha koordenasaun di’ak ho Ministériu Obra Públika.

“Agora ita buka hadi’ak dezeñu sira-ne’ebé iha ho nune’e ita halo buat ida bele iha kualidade no haan tempu naruk, se lae ita ansi halo de’it, liu fulan-neen monu fali,” nia hateten iha Maliana, kinta ne’e.

Enkuantu projetu ne’e responsabiliza husi empreza lokál Vieramor Unipesoál Lda ho kustu $2,060.737,42 (millaun rua-resin).

Xefe suku Odomau, Cirilo Sirio Bere, reprezenta komunidade sira preokupa ho projetu emerjénsia mkona-ba anutensaun estrada hahú husi área suku Lahomea ba to’o postu administrativu Bobonaro ne’ebé atrazada tanba implementa dezde tinan 2017 to’o agora seidauk finaliza.

Xefe suku Cirilo Sirio Bere husu ba Ministériu Obra Públika atu foti medida ruma tanba daudaun ne’e projetu referida paradu hela.

Notísia relevante: Kompañia Vieramor konstrui ponte iha área Hali-Mesak

“Ha’u hanesan líder komunitária lamenta tebes tanba kategoria projetu ne’e emerjénsia, rezultadu husi projetu refere ita la haree ba ninia benefísiu, realmente ita haree ninia kondisaun agora grave tebes liuliu parte área Galusapulu ba to’o área Oeleu, tanba ne’e husu ba Ministériu Obra Públika atu kontinua tau-matan ba obra ne’ebé implementa iha tinan hirak liubá,” nia ko’alia iha Jináziu Maliana.

Prezidente Komisaun E ne’ebé trata asuntu Infraestrutura, Deputadu Marcos Xavier, esplika, fiskalizasaun deteta katak projetu ne’e la’o atraza tanba mudansa dezeñu Bill Off Quantity ( BOQ) ne’ebé lori tempu naruk.

“Mudansa husi ne’e katak muda item ida ne’e ba item ida-ne’ebá ne’e han tempu, aprovasaun ne’e tenke husi Obra Públika ba to’o iha AND, sé husi Obra Públika haan fulan ida entaun ba ADN mós haan lubuk ida, dalaruma prosesu fulan-neen liu hanesan ne’e, ninia impaktu ne’e ba emprezáriu sira, entaun governu tenke aselera mudansa BOQ pelumenus fulan ida remata ona,” nia katal.

Nia dehan, sé halo mudansa to’o fulan-neen obra labele la’o, labele fó sala ba kompania lokál sira, tanba nia halo buat-ne’ebé nia halo, buat-ne’ebé labele, nia labele, tanba governu labele selu.

Nia dehan, projetu referida on going hela tanba kompañia nia materiál sei iha hela terrenu.

“Ita lalika politiza obra sira-ne’e, governu sé de’it mak sa’e tenke kontinua, oinsá bele halo dezenvolvimentu ba povu,” nia hateten.

Jornalista   : Sérgio da Cruz
Editór          : Evaristo Soares Martins

iklan
iklan

Leave a Reply

iklan
error: Content is protected !!