BOBONARO, 02 feveiru 2024 (TATOLI)-Komunidade no motorista sira preokupa ho kondisaun ponte ida iha área Ili-Bole, suku Oe-leu, ne’ebé halo ligasaun hosi postu administrativu Bobonaro ba postu administrativu Maliana, munisípiu Bobonaro, ne’ebé daudaun ne’e kotu hodi difikulta movimentasaun transporte públiku no privada.
Ponte refere hetan estragus ka aat totál iha tinan kotuk no daudaun ne’e bainhira tempu udan fó impaktu maka’as ba movimentasaun transporte Públiku no privada liuliu kamioneta sira ne’ebé tula sasán todan.
Notísia relevante: Kompañia Vieramor konstrui ponte iha área Hali-Mesak
“Ami movimentu ba mai ne’e ladún di’ak, dalaruma mota tún maka’as ami sei hein, mota ne’e menus oituan mak foin movimentu liu mai fali, ami husu ba Obra Públika tenke ser tau-matan lalais ba ami-nia área Bobonaro ho Maliana, liuliu ba mota oan ida-ne’e,” Komunidade Lolotoe, Noel Afonso, informa Jornalista sira iha terrenu, sesta ne’e.
Komunidade suku Bobonaro vila, Justino da Costa Henriques, husu Ministériu Obra Públika atu orienta empreza ruma halo intervensaun lalais ba ponte refere inklui kondisaun estrada ligasaun hosi Maliana ba Bobonaro no Lolotoe.
“Ponte ne’e sira sobu tiha, sasán sira agora tau fali iha ninin mai, agora udan boot bee tun ami labele liu ba mai ona, se bele sira mai hadi’a fali, tau fali sasán ruma hodi fasilita ami halo movimentu ba mai, se lae ami araska, presiza mos tau-matan ba estrada Bobonaro-Maliana ne’e tanba agora aat hotu ona,” nia fó hanoin.
Xefe suku Oe-Leu, Januário Meta Tae Bragança, informa iha empreza ida mak durante ne’e halo hela manutensaun ba estrada, bee-dalan no ponte sira ligasaun hosi Maliana ba Bobonaro liuhosi pakote emerjénsia.
“Hadi’ak mos sei nafatin la la’o, ninia faila ne’e iha-ne’ebé ami rasik lahatene, ami autoridade lokál husu Ministeriu Obra Públika bele normaliza ona iha tempu badak atu nune’e ita-nia movimentasaun transporte bele la’o ho diak,” nia rekomdenda.
Líder lokál ne’e husu ba governu atu tau-matan ba kondisaun estrada diresaun Maliana ba Bobonaro no Lolotoe, daudaun ne’e infraestrutrura fízika ne’ebé konstrui iha tempu Indonézia kuaze aat totál.
Ponte refere hanesan ponte alternativu ne’ebé ligasaun hosi Maliana ba Bobonaro no Lolotoe, inklui postu administrativu Atsabe, munisípiu Ermera no munisípiu Covalima.
Tuir Observasaun Agência Tatoli iha terrenu nota katak, movimentasaun transporte públiku diresaun Bobonaro ba Maliana normál hela, maibé iha tempu udan hamosu engrafamentu iha area Ilibole, tanba mota boot liu ladi’ak.
Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe
Jornalita: Sérgio da Cruz
Editór: Evaristo Soares Martins
