UNTL planeia realiza graduasaun ba finalista 1.790 iha Novembru
DILI, 10 Novembru 2026 (TATOLI)—Universidade Nasionál Timor Lorosa’e (UNTL) sei realiza serimónia graduasaun ba da-XXXV ba estudante finalista hamutuk 1.790, iha fulan-Novembru 2026, inklui estudante husi programa pós-graduasaun no mestradu.
Vise-Reitór Asuntu Akadémiku UNTL, Câncio Manteiro, afirma katak númeru estudante finalista hamutuk 1.790 ne’e daudaun iha prosesu koordenasaun téknika ho Ministériu Ensinu Superiór, Siénsia no Kultura (MESSK), atu hetan aprovasaun no verifikasaun finál.
“Numeru ida-ne’e daudaun iha prosesu koordenasaun téknika ho MESSK. Tanba ita tenke hetan despaxu husi MESSK, hafoin ita bele hala’o graduasaun tuir data ne’ebé Magnífiku Reitór halo mudansa,” Câncio Manteiro dehan ba jornalista sira, iha Kampus Sentrál UNTL, Dili, Tersa ne’e.
Nia esplika katak, tuir kalendáriu akadémiku UNTL ba 2026, serimónia graduasaun semestre daruak nian tenke hala’o iha loron 16 to’o 18 Dezembru, maibé universidade deside atu muda ba fulan-Novembru tanba konsiderasaun nesesidade servisu iha finde tinan no preparasaun ba selebrasaun loron aniversáriu (Dies Natalis) UNTL.
Nune’e, Magnífiku Reitór propoin atu muda data graduasaun ba 26-27 Novembru, no universidade daudaun ne’e hein hela verifikasaun finál husi MESSK.
“Ita-nia Magnífiku Reitór muda ba loron 26-27 Novembru ne’e. Tanba ne’e, ita halo hela servisu atu asegura desizaun ne’ebé Magnífiku Reitór hatuun ona, agora ita hein verifikasaun finál husi MESSK,” nia afirma.
Câncio Manteiro hatutan katak pedidu despaxu husi Reitór ba MESSK hato’o ona iha loron 23 Outubru liubá. Maibé, tuir despaxu ka sirkulár ministériu nian, prosesu verifikasaun dadus estudante tenke hala’o fulan ida antes serimónia graduasaun.
Kona-ba prosesu Judisium, nia esplika katak atividade ne’e depende ba planu no preparasaun fakuldade idaidak. Tanba ne’e, fakuldade sira presiza hato’o despaxu husi dekanu kona-ba rezultadu Judisium, atu universidade bele inklui númeru despaxu referidu iha diploma graduadu sira-nian antes prosesu impresaun.
“Saida mak importante ba ita mak ita presiza despaxu husi dekanu fakuldade sira ba Judisium nian. Nune’e, númeru despaxu sira-ne’e ita tenke inklui ona iha diploma graduadu sira-nian, atubele imprime,” nia dehan.
Iha parte seluk, Vise-Reitór ne’e informa katak tema jerál graduasaun ba tinan-ne’e mak “Graduados Competentes, Éticos e Inovadores para os Desafios Globais e o Desenvolvimento Sustentável de Timor-Leste”.
Nia esplika katak tema ne’e ajusta atu fó responsabilidade ba graduadu sira, hodi sira bele asume papél importante iha komunidade no kontribui ba dezenvolvimentu sustentável Timor-Leste.
Totál graduadu hamutuk 1.790 ne’e kompostu husi estudante programa pós-graduasaun na’in-52, no fakuldade sira ho distribuisaun hanesan tuirmai:
– Fakuldade Agrikultura iha 109
– Fakuldade Ekonomia no Jestaun iha 195
– Fakuldade Turizmu, Arte Indústria Kriativa no Kultura iha 63
– Fakuldade Siénsia Ezata no Naturál iha ualu (8)
– Fakuldade Medisina no Siénsia Saúde iha 239
– Fakuldade Enjeñaria, Siénsia no Teknolojia iha 220
– Fakuldade Siénsia Sosiál no Polítika iha 322
– Fakuldade Direitu iha 27
– Fakuldade Filosofia no Siénsia Umanidade iha 57
– Fakuldade Edukasaun no Umanidade iha 498.
Nune’e, fakuldade ho númeru graduadu barak liu mak Fakuldade Edukasaun no Umanidade ho estudante na’in-498, tuirmai Fakuldade Siénsia Sosiál no Polítika ho na’in-322, no Fakuldade Medisina no Siénsia Saúde ho na’in-239.
Klik notísia relevante sira iha kraik hodi lee:
UNTL prepara finalista 1.461 ba graduasaun da-XXXIV – TATOLI, 28 Abríl 2026. Notísia ida-ne’e relata preparasaun UNTL ba serimónia graduasaun ba dala-XXXIV iha 2026, ho estudante finalista hamutuk 1.461, inklui estudante husi programa pós-graduasaun no mestradu. Iha períodu ne’ebá, universidade mós halo prosesu verifikasaun dadus estudante no diploma provizória molok submete ba MESSK atu hetan aprovasaun.
UNTL prepara finalista 1.700 ba graduasaun iha Jullu – TATOLI, 28 Maiu 2025. Iha tinan 2025, UNTL liuhusi Vise-Reitór Asuntu Akadémiku no Garantia Kualidade, Samuel Freitas, informa katak universidade prepara estudante finalista hamutuk 1.700 husi fakuldade 10 atu partisipa iha serimónia graduasaun. Iha tempu ne’ebá, data graduasaun seidauk define tanba universidade hein hela prosesu verifikasaun husi MESSK.
Jornalista: Osória Marques
Editór: Xisto Freitas da Piedade
