CNE husu Serbisu Notariadu fasilita STAE atualiza baze dadus eleitór iha Baukau
BAUKAU, 10 Novembru 2026 (TATOLI)—Komisaun Nasionál Eleisaun (CNE-sigla portugeza) rekomenda ba Diresaun Serbisu Munisipál Konservatóriu no Rejistu Notariadu (SMCRN-sigla portugeza) atu fasilita Sekretariadu Tékniku Administrasaun Eleitorál (STAE) iha prosesu atualizasaun baze dadus eleitór iha Munisípiu Baukau, liuliu hodi rezolve obstákulu dokumentasaun ne’ebé komunidade enfrenta atu hetan kartaun eleitorál biométriku.
Komisária CNE, Teresinha Maria Noronha Cardoso, esplika katak rekomendasaun ne’e sai nu’udár rezultadu husi enkontru koordenasaun entre instituisaun relevante sira, inklui CNE, STAE, DCSRNM, Komandu Polísia, Autoridade Munisipál, autoridade postu administrativu no partidu polítiku, atu hametin kooperasaun no buka solusaun ba problema sira-ne’ebé mosu durante prosesu atualizasaun baze dadus eleitór.
“Problema ne’ebé komunidade enfrenta atualmente mak kona-ba rekizitu atu trata kartaun eleitorál. Ida-ne’e sai nu’udár fatór ida-ne’ebé halo ita presiza servisu hamutuk atu asegura eleitór hotu-hotu bele asesu ba sentru atendimentu,” Teresinha dehan ba jornalista sira iha salaun STAE, Vila Nova, Baukau, Tersa ne’e.
Nia relata katak ekipa STAE Baukau, hamutuk ho CNE, hala’o ona prosesu atualizasaun baze dadus iha suku 53, tuir oráriu ne’ebé determina ona, iha nivel postu administrativu.
Nu’udár órgaun reguladór eleisaun, CNE husu mós ba instituisaun relevante sira, autoridade postu administrativu no suku, inklui Polísia Nasionál Timor-Leste (PNTL), atu kontinua kolabora no divulga informasaun ba komunidade, hodi aumenta partisipasaun iha prosesu pré-eleitorál, liuliu atu trata kartaun eleitorál biométriku no atualiza dadus pesoál.
“Hakarak konvida Diresaun Serbisu Notariadu atubele hala’o servisu hamutuk ho STAE iha nivel postu administrativu, inklui konsentra atendimentu iha área remota sira,” Teresinha Cardoso akresenta.
Entretantu, bazeia ba dadus provizóriu, totál eleitór iha Munisípiu Baukau hamutuk 107.261. Husi númeru ne’e, eleitór na’in-44.787 mak atualiza ona sira-nia dadus, enkuantu 50.000-resin seidauk atualiza tanba la kumpre rekizitu dokumentu ne’ebé estabelese ona.
Dokumentu ne’ebé komunidade presiza aprezenta atu hetan kartaun eleitorál mak Sertidaun RDTL, kartaun Billete Identidade ka pasaporte ne’ebé sei válidu.
Kontestu
STAE hahú ona prosesu resenseamentu eleitorál no atualizasaun baze dadus eleitór ho sistema biométriku iha postu administrativu 69 iha territóriu nasionál, iha 07 Outubru 2026, nu’udár parte husi preparasaun ba Eleisaun Prezidensiál 2027. Prosesu ne’e inklui rejistu eleitór foun, atualizasaun dadus pesoál no troka kartaun eleitorál ba sistema biométriku.
Iha Munisípiu Baukau, STAE hahú prosesu ne’e iha inísiu Outubru 2026, ho distribuisaun ekipamentu no funsionáriu ba postu administrativu ualu. Tuir kalendáriu, atualizasaun baze dadus eleitór iha munisípiu ne’e sei kontinua to’o 22 Janeiru 2027.
Klik notísia relevante sira iha kraik hodi lee:
- STAE hahú halo resensiamentu eleitorál iha postu 69 iha territóriu – TATOLI, 07 Outubru 2026.
- STAE Baukau hahú atualiza dadus eleitór biométriku iha postu administrativu ualu – TATOLI, 15 Outubru 2026.
Jornalista: Natalino Belo
Editór: Xisto Freitas da Piedade
