Balkaun Úniku Bobonaru prodús ona dokumentu 3.440
BOBONARU, 11 Novembru 2026 (TATOLI) – Balkaun Úniku Munisípiu Bobonaru prodús ona dokumentu ofisiál hamutuk 3.440, inklui Billete Identidade (BI) orijinál 2.652, sertifikadu rejistu kriminál 543 no pasaporte 245, hahú husi Marsu to’o Novembru 2026.
Koordenadora Balkaun Úniku Munisípiu Bobonaru, Cesaltina da Costa, hatete katak servisu dokumentu sira ne’e disponivel atu fasilita sidadaun sira asesu ba dokumentu importante ho lalais no fásil.
“Servisu ne’ebé disponivel iha Balkaun Úniku mak rejistu kriminál, pasaporte no Billete Identidade. Hahú husi Marsu to’o agora ita prodús ona Billete Identidade orijinál 2.652, sertifikadu rejistu kriminál 543, pasaporte 245”, nia informa ba jornalista sira iha kna’ar-fatin, kuarta ne’e.
Nia informa katak bazeia ba akordu ho Diresaun Servisu Notariadu Munisípiu Bobonaru, Balkaun Úniku halo atendimentu ba Billete Identidade husi segunda to’o kinta-feira, ho kapasidade atende sidadaun na’in-25 kada loron.
Enkuantu, ba sertifikadu rejistu kriminál, atendimentu hala’o iha kuarta no kinta-feira, ho kapasidade atende sidadaun na’in-25 kada loron, tuir nesesidade komunidade nian.
Ba servisu pasaporte, koordenadora ne’e dehan katak atendimentu depende ba oráriu no autorizasaun husi servisu nasionál. Husi Marsu to’o Novembru 2026.
“Husi Marsu mai to’o Novembru ne’e sira husi nasionál manda oráriu mai kada fulan, atendimentu pasaporte dala-haat, ida ne’e la’ós iha balkaun de’it. Iha balkaun ami atende dala-rua, iha notariadu dala-rua”, nia relata.
Koordenadora ne’e esplika katak durante períodu ne’e, ekipa Balkaun Úniku kontinua halo atendimentu ba komunidade, maski hasoru dezafiu balun, liuliu interrupsaun eletrisidade no problema ligasaun internét ne’ebé depende ba sistema husi Diresaun Nasionál Identifikasaun Sivíl (DNIC).
“Kuandu eletrisidade mate, ami labele kontinua halo atendimentu tanba sistema internét no prosesamentu dokumentu depende ba eletrisidade. Maibé, ami esplika ba sidadaun sira no sira komprende situasaun ne’e”, Cesaltina hatete.
Koordenadora ne’e aumenta katak Balkaun Úniku iha planu atu estende atendimentu móvel ba postu administrativu sira iha Bobonaru, liuliu tanba distánsia entre postu administrativu sira no kapitál munisípiu sei sai obstákulu ba komunidade atu asesu servisu públiku.
Nia afirma katak planu ne’e diskute ona ho Diretór Servisu Notariadu Munisípiu Bobonaru, ho objetivu atu aproxima atendimentu ba sidadaun sira no fasilita asesu ba dokumentu ofisiál.
“Governu nia intensaun mak atu fasilita no hadi’a kualidade servisu ba sidadaun, nune’e ami iha planu atu lori atendimentu móvel bá postu administrativu sira tanba balun dook husi kapitál munisípiu”, nia afirma.
Cesaltina da Costa realsa katak atualmente Balkaun Úniku foka liu ba atendimentu direta, enkuantu atendimentu móvel no online sei sai parte husi planu dezenvolvimentu servisu iha futuru.
Notísia relevante: PM inaugura Balkaun Úniku hodi garante servisu efisiente ba povu Bobonaru
Jornalista: Sergio da Cruz
Editora: Maria Auxiliadora
