DILI, 26 juñu 2023 (TATOLI)—Ministériu Obra Públika (MOP), iha tersa (27/06) sei halo lansamentu fatuk dahuluk ba projetu reabilitasaun estrada ligasaun hosi Aileu (Be’Kluru) bá postu administrativu Lequidoe, munisípiu Aileu.
“Projetu ne’e hetan ona vistu hosi Kámara Konta Tribunál Rekursu. Ida-ne’e legalmente hatudu laiha ona problema ho orsamentu,” Ministru Obra Públika, Abel Pires da Silva, hateten, iha salaun MOP, Caicoli, segunda ne’e.
Antes ne’e, liuhosi reuniaun Konsellu Ministru iha loron 22 fevereiru 2023, aprova ona projetu reabilitasaun estrada Aileu (Be’e Kluru) bá postu administrativu Lequidoe.
Notísia relevante : Governu sei reabilita estrada Aileu bá Likidoe no iha sidade Maliana
Orsamentu ba reabilitasaun estrada hamutuk $24.235.453,31, ne’ebé orsamentu ne’e mai hosi Fundu Infraestrutura, ho períodu kontratu serbisu ba fulan-18 no retensauun aumenta to’o fulan-12.
Projetu ne’e sei toma konta gosi empreza Osman J.V, Areco, China Overseas Engineering Timor Unip, Lda.
Jornalista : Arminda Fonseca
Editora : Julia Chatarina
