DILI, 02 Jullu 2026 (TATOLI) – Iha komemorasaun aniversáriu Ajénsia Notisioza Timor-Leste Tatoli, I.P, ba dasanulu (2016-2026), eis-Prezidente Konsellu Diretivu Tatoli, José da Costa, no Manuel Pinto, husu instituisaun ne’e atu kontinua prodús no divulga informasaun ne’ebé kredivel, hametin konfiansa públika no adapta ba dezenvolvimentu dijitál, inklii intelijénsia artifisiál (AI).
Apelu ida-ne’e hato’o iha Programa Talk Show ne’ebé Tatoli realiza ho tema “Inovasaun, Kredibilidade no Transformasaun Dijitál”, nu’udar parte husi selebrasaun aniversáriu Tatoli nian.
José da Costa hateten Tatoli iha ona baze ne’ebé metin durante tinan 10 nia laran, maibé sei hasoru dezafiu atu manán no hametin konfiansa públika.
“Tatoli nia dezafiu mak oinsá atu gaña konfiansa públika ka leitór sira bele rona, akompaña ka haree Tatoli ne’e beibeik. Tatoli tenke sai alternativa ida atu Estadu uza hanesan nia notísia sira ne’ebé prodús, nia tenke sai referénsia”, José da Costa afirma.
Antigu dirijente ne’e saliente katak dezafiu seluk ba futuru mak kapasidade Tatoli atu adapta mudansa teknolojia, liuliu dezenvolvimentu artifisiál intelijénsia, ne’ebé muda forma jornalista sira halo serbisu.
Nia husu ba jornalista no funsionáriu Tatoli atu komprende katak sira-nia responsabilidade la’ós de’it atu presta informasaun ka presta servisu ba públiku, maibé mós reprezenta ajénsia notísioza ofisiál Estadu nian. “Parabéns ba TATOLI kontinua serbisu, funsiona nafatin hanesan ajénsia ida-ne’ebé fundadór sira mehi”, nia hato’o.
Iha oportunidade hanesan, eis-Prezidente Konsellu Diretivu Tatoli, Manuel Pinto, husu ba jestór no jornalista sira atu prepara Tatoli sai “guarda rede” ba informasaun nasionál internasionál ne’ebé importante ba públiku.
Nia dehan Tatoli presiza transforma modelu serbisu tradisionál ba plataforma dijitál no buka adapta lalais ba evolusaun dijitál, inklui AI. “Tanba Tatoli ohin loron, ita bele haree ita-nia produtu ne’e sei iha nivel ida de’it”, nia hateten.
Nia observa katak Tatoli barak liu fó atensaun ba atividade Governu, serimónia ofisiál no konferénsia imprensa, maibé seidauk dezenvolve produtu jornalístiku ne’ebé bele halo públiku koñese Tatoli ho identidade rasik.
“Tatoli labele halo fali kompetisaun ho mídia sira seluk, maibé foku faktu ba notísia sira seluk ne’ebé sai, tanba Tatoli nia misaun ida mak clearing house”, nia hateten.
Iha aniversáriu ba da-10 ne’e, Manuel Pinto mós enkoraja jornalista sira atu hasa’e koñesimentu, kapasidade análize no verifika dadus atu eduka sosiedade. “Hau hakarak parabeniza Tatoli, kontinua hakat ba oin ho mehi sira ne’ebé iha. Ha’u orgullu tanba nafatin fó kontinuidade ba sasán ne’ebé ami hatuur ona. Ha’u fiar metin ritmu sira ne’e, loron ida Tatoli mós bele kompete ba ajénsia sira seluk”, nia espera.
Nia mós apela ba públiku atu nafatin tau konfiansa no akompaña notísia Tatoli nian, tanba ajénsia ida-ne’e eziste atu serbí públiku ho informasaun.
Iha sorin seluk, atuál Prezidente Konsellu Diretivu Tatoli, I.P., Noémio Falcão, agradese ba rekomendasaun no eperiénsia ne’ebé eis-Prezidente Tatoli na’in-rua fahe, tanba konsidera importante atu reforsa dezenvolvimentu instituisaun.
Nia mós husu ba públiku nafatin tau konfiansa ba Tatoli liuhusi nia publikasaun sira no programa sira hanesan TATOLI Atuál, TATOLI Global, TATOLI Hakbesik, no Bainaka Kredivel.
“Tanba ida-ne’e kanál Estadu nian ne’ebé ho informasaun kredivel no kualidade. Fiar ba ami hanesan fiar mós ba informasaun ne’ebé loos”, nia konklui.
Tatoli, I.P nu’udár Ajénsia Ofisiál Estadu Timor-Leste nian. nia ezisténsia mai husi inisiativa Sekretaria Estadu Komunikasaun Sosiál (SEKOMS)m iha 2012-2017, nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu Ministru aprova ANTIL sai Tatoli, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (IP).
Objetivu estabelese Ajénsia Tatoli, I.P sai fonte informasaun ofisiál Estadu Timor-Leste neʼebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karaterístika; rapidés no rigór, maibé labele ignora akurasia, rigór, indepedente, izenta, klareza no nafatin iha integridade nomós kredibilidade.
Notísia relevante: Rui de Araújo espera TATOLI kontinua publika informasaun kona-ba prosesu dezenvolvimentu nasionál
Jornalista: Arminda Fonseca
Editora: Maria Auxiliadora
