DILI, 01 Jullu 2026 (TATOLI)—Ajénsia Notisioza TATOLI, I.P sei selebra nia aniversáriu ba da-X iha 27 Jullu tinan-ne’e. Nune’e, Antigu Primeiru-Ministru, Rui Maria de Araújo espera TATOLI kontinua publika informasaun kona-ba prosesu dezenvolvimentu nasionál.
“To’o agora, iha kobertura ida-ne’ebé di’ak tebetebes, la’ós de’it iha termu jeográfiku, maibé mós iha termu língua, ne’ebé halo akompaña direta ba ita-boot sira-nia notísia online iha Tetun, Portugés, Inglés no Bahasa Indonézia, inklui vídeo sira-ne’e hatudu katak ida-ne’e mak progresu boot tebes iha tinan sanulu nia laran. Parabéns ba ita-boot sira ba serbisu ne’ebé halo ona. Hein katak ita-boot sira-nia serbisu profisionál bele kontinua informa di’ak ba públiku, sidadaun Timor-Leste hotu kona-ba prosesu konstrusaun Estadu-Nasaun ne’ebé ita hala’o hela,” Rui Maria de Araújo dehan ba TATOLI iha nia hela fatin, foin lalais ne’e.
Nia hatutan: “Ita presiza sidadaun ne’ebé informadu, no ho baze ba informasaun ne’e mak sidadaun sira bele partisipa di’ak liután iha prosesu dezenvolvimentu nasaun nian”.
Antigu Primeiru-Ministru ne’e kontinua dezafia jornalista TATOLI atu rekolla no habelar informasaun ho loloos no faktu ba públiku.
“Parabéns ba imi-nia ba aniversáriu tinan sanulu. TATOLI signifika hato’o, habelar no halibur ema hotu liuhusi informasaun. Tanba ne’e, kontinua nafatin tatoli notísia ne’ebé loos, notísia ne’ebé bazeia ba evidénsia, ho imparsialidade no profisionalizmu, ba povu tomak iha Timor-Leste no mós ba sira-ne’ebé hela iha estranjeiru,” Rui Maria tenik.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P mai husi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu-Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (IP).
Objetivu estabelese ajénsia TATOLI, I.P sai fonte informasaun ofisiál Estadu Timor-Leste neʼebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora akurasia, rigór, indepedente, izenta, klareza no nafatin iha integridade no mós kredibilidade.
Jornalista: Osória Marques
Editór: Xisto Freitas da Piedade
