VIQUEQUE, 17 jullu 2023 (TATOLI)—Ahi han uma ida iha aldeia Canlor, suku Luca, postu administrativu Viqueque Vila, munisípiu Viqueque kauza hosi sirkuitu elétriku.
“Insidente ne’e akontese iha meiu dia maizumenus tuku 12:00 horiseik domingu (16/07) kauza hosi sirkuitu elétriku ne’ebé instala iha uma-laran maka ahi han hodi afeta ba uma. Nune’e horiseik ami bá verifika no distribui pakote emerjénsia,” Adjuntu Autoridade Protesaun sivil (APC, sigla portugés), Cirilio Soares Gomes, informa ba Agência Tatoli, iha postu Viqueque Vila, segunda ne’e.
Akontese sirkuitu elétriku tanba fiu mai uma-laran ahi han hodi rezulta odamatan, kalen uma, kama, kulsaun no seluk tan ahi han hotu.
“Ami verifika ona ninia grau a’at ne’e kama’an no ami mós distribui pakote emerjénsia sira hanesan foos, mina, supermie, dose, lona, bikan kanuru no seluk tan,” nia akresenta.
Notísia relevante : APC Viqueque rejista uma-kain 46 afetadu dezastre naturál
Ba kestaun ne’e, nia fó hanoin ba kliente eletrisidade iha Viqueque, bainhira uza eletrisidade tenke kuidadu nune’e labele fó impaktu ba uma.
“Ha’u husu ba abitante sira iha munisípiu Viqueque tenke kuidadu di’ak ahi eletrisidade atu nune’e la han uma no bainhira dada eletrisidade ba uma tenke informa ba tékniku Eletricidade de Timor Leste, Empreza Públika (EDTL, E.P) maka halo instalasaun,” nia fó hanoin.
Uma ne’ebé ahi han ho uma-kain ida, kompostu hosi membru família hamutuk na’in-haat.
Jornalista : Vitorino Lopes da Costa
Editora : Julia Chatarina
