VIQUEQUE, 10 jullu 2023 (TATOLI)—Autoridade Protesaun Sivíl (APC) Viqueque halo identifikasaun no rejista uma-kain hamutuk 46 afetadu dezastre naturál iha semana kotuk ne’e.
“Uma-kain afetadu 46 maioria afetadu inundasaun bee tama abitante sira-nia uma, iha postu Viqueque Vila uma-kain hamutuk 22, inklui rai halai no ahi-han uma. Ami distribui ona pakote emerjénsia ba família afetadu sira no ami halo asesmentu ba afetadu sira-nia uma ne’ebé hetan estragu ne’e, ramata ona no entrega ona ba nasionál hodi hein prosesu rekuperasaun,” Komandante Polísia Nasionál Timor Leste (PNTL) Viqueque no Komandante Operasaun APC, Inspetór Polisia, Matias da Silva, informa hafoin ramata distribuisaun pakote emerjénsia ba vítima dezastra naturál, iha suku Babulu, segunda ne’e.
Notísia relevante : Dadus provizóriu: APC Viqueque identifika uma-kain 750 afetadu inundasaun
Aleinde ne’e, APC Viqueque aprezenta ona lista rekuperasaun uma 22 ba diresaun nasionál, nune’e bainhira hetan aprovasaun maka ekipa sei halo distribuisaun.
“Tuir dadus, iha postu Ossu iha uma ida maka ahi-han maibé APC seidauk distribui materiál emerjésia tanba kondisaun estrada a’at, iha suku Babulu, postu Uatulari iha uma-kain 22 no suku Macadique uma ida afetadu dezastre naturál. Nune’e, ohin ami kontinua halo distribuisaun pakote emerjénsia iha postu Uatulari, liu-liu iha suku ne’ebé foin lalais afetadu ba inudasaun, enkuantu iha postu Uatucarbau no Lacluta maka to’o agora ami seidauk identifika família afetadu sira,” nia akresenta.
APC mós identifika fatin risku ba inundasaun iha aldeia Uma-boot, suku Luca, postu Viqueque Vila, ne’ebé uma-kain 13 sai risku ba inundasaun tanba mota liu abitante nia uma oin, nune’e presiza harii protesaun ruma hodi salva.
Ba faze dahuluk uma-kain 23 simu ona pakote emerjénsia no faze rua iha uma-kain 23 mak sei simu.
Autoridade halo distribuisaun pakote emerjénsia iha suku Babulu, postu Uatulari, kompostu hosi tipu rua, food mak hanesan foos, mina, supermi, sardina, kafé, masin-midar no naun food maka bikan, kanuru, lona inklui sasán sira seluk.
Jornalista : Vitorino Lopes da Costa
Editora : Julia Chatarina
