DILI, 05 jullu 2023 (TATOLI)—Autoridade Protesaun Sivíl (APC, sigla portugés) Viqueque, daudaun ne’e halo identifikasaun iha suku Bibileo, postu Viqueque Vila, munisípiu Viqueque, ne’ebé provizóriamente iha uma-kain 750 afetadu inundasaun hafoin udan-boot iha loron hirak ikus ne’e.
Xefe Departamentu Nasionál Jestaun Dezastre (DNJD) APC munisípiu Viqueque, Recardino Soares, esplika, akontesimentu udan-boot iha loron 04 jullu 2023 kalan halo abitante sira-nia uma barak afetadu inundasaun, liu-liu iha postu Viqueque Vila.
“Horiseik ami ba haree suku Bibileo, abitante maioria afetadu inundasaun. Ami daudaun rekolla dadus provizóriu iha uma-kain hamutuk 750. Hosi dadus ne’e, bee tama uma-laran no laiha estragu totál. Daudaun ne’e ami sei kontinua halo verifikasaun ba vítima sira hosi suku Bibileo no suku Luca, ne’ebé iha suku Luca, iha parte aldeia Uma-boot maka afetadu, maibé ami seidauk ba halo verifikasaun tanba dalan bá Uelolo ita liu ladi’ak,” Recardino Soares informa ba Agência Tatoli, via telefónika, kuarta ne’e.
Notísia relevante : Xanana orienta MOP halo intervensaun infraestrutura hetan impaktu dezastre naturál
Nia dehan, inundasaun la’ós afeta ba abitante sira-nia hela fatin de’it, maibé estraga infraestutura hanesan dalan liga ba suku Bibileo no abitante nia natar ektare 50, ne’ebé lokaliza iha suku Bibileo.
“Ha’u haree kada tinan bainhira mota Uetuku bee-boot, sempre afeta ba abitante sira iha suku Bibileo nia uma. Agora ami hamutuk ho Autoridade lokál no Cruz Vermelha de Timor-Leste (CVTL) halo identifikasaun ba vítima afetadu tanba ami seidauk verifika hotu dadus. Daudaun ne’e udan-been normál fali ona no bee-mota mós hahú menus, tanba ne’e ami la halo evakuasaun ba vítima sira,” nia akresenta.
Iha fatin ketak, Administradór postu Viqueque Vila, Duarte Brandão Soares, husu abitante postu Viqueque Vila tenke tau-atensaun maka’as tanba agora tempu udan, nune’e bainhira udan monu-rai tenke hakmatek iha uma no tau-matan ba labarik sira.
“Ha’u husu ba abitante Viqueque Vila tenke atensaun ba udan tanba daudaun ne’e tempu udan, tenke tau-matan ba labarik sira labele haris iha mota no labele tama tasi,” nia tenik.
Abitante afetatadu inundasaun iha suku Uma Uain Kraik, Bahalara Uain, Luca no Bibileom postu Viqueuque Vila, ne’ebé APC sei kontinua halo verifikasaun ba uma-kain afetadu dezastre naturál.
Jornalista : Vitorino Lopes da Costa
Editora : Julia Chatarina
