NASIONÁL, EKONOMIA, HEADLINE

Xanana orienta MOP halo intervensaun infraestrutura hetan impaktu dezastre naturál

Xanana orienta MOP halo intervensaun infraestrutura hetan impaktu dezastre naturál

Udan-boot halo rai halai iha munisípiu Ainaro. Imajen/Espesiál

DILI, 04 jullu 2023 (TATOLI)—Primeiru-Ministru (PM), Kayrala Xanana Gusmão, fó orientasaun ba instituisaun responsável atu halo intervensaun direita ba estrada no ponte ne’ebé kotu, inklui buka solusaun salva populasaun hosi risku dezastre naturál ne’ebé akontese hafoin mosu udan-boot.

Xefe Governu husu ekipa Ministériu Obra Públika (MOP) no Institutu Jestaun Ekipamentu no Apoiu Dezenvolvimentu Infraestrutura, Institutu Públiku  (IGEADI, I.P) atu mobiliza ekipamentu pezadu tun direita ba área ne’ebé sai risku hodi suru sai rai monu taka estrada.

Ministru Obra Públika, Samuel Marçal, relata, udan no anin maka’as akontese iha territóriu tomak rezulta estrada no ponte kiik balun kotu.

“Primeiru-Ministru prepara ona programa Governu nian, tanba ne’e mak fó ona orientasaun ba MOP no IGEADI iha munisípiu sira hodi atua hela situasaun ne’e, maibé seidauk bele halo asaun ruma tanba hein udan para maka foin bele halo asaun, maibé ekipa prepara ona iha terrenu hodi halo intervensaun atu salva uluk vítima sira ne’ebé uma hetan estragu,” Ministru hateten iha Palásiu Governu, hafoin ramata reuniaun Konsellu Ministru, tersa ne’e.

Notísia relevante : Governu afirma kompromisu serbisu loron 120 nian iha reuniaun dahuluk KM

Ekipa MOP no IGEADI desloka ona ba terrenu hodi halo levantamentu ba estragu hanesan estrada Eralessu, suku Molo, postu Hatubuilico, munisípiu Ainaro, enkuantu ponte kiik no estrada kotu totál no rai monu taka dalan iha suku Aituto, postu Maubisse, munisípiu Ainaro.

Xefe Governu orienta salva uluk populasaun tanba udan ho intesidade moderadu sei kontinua akontese iha loron ikus.

“Tuir orientasaun Primeiru-Ministru nian katak ekipa ba uluk iha terrenu hodi buka salva uluk populasaun nia vida hosi risku ne’ebé lori dezastre no estragu oin-oin,” Samuel tenik.

Nune’e, ekipa MOP-IGEADI identifika iha Ponta Leste, Lautém, iha ponte Api-Kuru ne’ebé ameasadu kotu tanba mota boot sobu morru protesaun kuaze hetan estragu.

Aleinde ne’e, Ekipa rekolla ona dadus iha estrada diresaun Lehulolo Aitutu, Same ligasaun Ainaro iha ponte kiik ida kotu no estrada Holarua parte Tangue da Guterra ameasadu kotu no daudaun ne’e Autoridade lokál koordena hela ho Komandu Polísia Nasionál Timor-Leste (PNTL) no Bombeiru hodi halo intervensaun.

Iha Munisipiu Viqueque udan halo rai-monu taka estrada públiku no ameasadu estraga uma ne’ebé harii besik mota ninin.

Dezastre naturál ne’e afeita mós ba uma komunidade nian lubuk ida hetan estragu, nune’e Governu liuhosi Ministériu Solidaridade Sosiál no Inkluzaun (MSSI) daudaun rekolla hela dadus iha terrenu hodi prepara ona kondisaun atu apoia vítima sira.

Dezastre naturál ne’e rezulta estresidade monu iha suku Casa, postu Ainaro vila, hodi halo liña eletrisidade iha postu Maubissi, Hatubilico, Turiskai mate totál.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!