DILI, 02 agostu 2023 (TATOLI)—Governu Koreia Súl liuhosi Embaixadór iha Timor-Leste, Shin Mantaek, kuarta ne’e, entrega ona livru lian koreia hamutuk 2.000 ba Sekretaria Estadu Formasaun Profisionál no Empregu (SEFOPE) hodi distribui ba sentru formasaun 26.
“Distribuisaun livru ne’e nu’udar inisiativa hosi Embaixadór Koreia Súl iha Timor-Leste no SEFOPE atu distribui livru ba sentru formasaun sira ne’ebé ho inisiativa fó formasaun lian koreia ba joven sira atu asesu ba merkadu internasionál, liu-liu Koreia Súl,” Sekretáriu Estadu Formasaun Profisionál no Empregu, Rogério Araujo Mendonça, hateten, Sentru Formasaun SENAI, iha Becora.
Notísia relevante :Governu Koreia Súl sei apoia livru 6.000 ba SEFOPE
Sekretáriu Estadu dehan, livru sira ne’e di’ak tebes tanba ba oin joven sira ne’ebé hakarak apreende lian koreia ne’e la’ós de’it ona mai iha Sentru Formasaun Profisionál SENAI Becora, maibé sira bele tuir ona formasaun iha sentru formasaun privadu sira.
Iha fatin hanesan, Embaixadór Koreia Súl iha Timor-Leste, Shin Mantaek, hataten, inisiativa ne’e hodi fasilita joven sira apreende lian Koreia molok bá serbisu.
“Livru ne’ebé ohin ami mai distribui ne’e ho objetivu joven sira bele apreende lian koreia bele bá serbisu iha Koreia Súl, tanba daudaun ne’e Koreia Súl presiza traballadór estranjeiru barak atu bá serbisu,” nia akresenta.
Sentru formasaun 26 ne’ebé simu livru lian koreia mak hanesan Organizasaun Naun Governamentál Fiar, Sentru Quesadhip Ruak, Knua Buka Hatene (KBH), Unidade Sentru Formasaun Juventude, no seluk tan.
Jornalista : Arminda Fonseca
Editora : Julia Chatarina
