DILI, 14 jullu 2023 (TATOLI)—Governu Koreia Súl liuhosi Embaixada iha Timor-Leste iha tempu badak sei apoia livru kursu lian Koreia ba Sekretaria Estadu Formasaun Profisionál no Empregu (SEFOPE).
“Objetivu fó apoia atu fasilita di’ak liután joven sira ne’ebé hakarak frekuenta kursu lian Koreia,” Diretór Nasionál Empregu no Exteriór, Filomeno Soares, informa ba Agência Tatoli, iha ninia knaar fatin, Becora, sesta ne’e.
Livru 6.000 daudaun ne’e iha dalan ona, ne’ebé bainhira to’o mai sei fahe ba parte tolu hanesan livru 2.000 sei fó ba Korean International Cooperation Agency (KOICA) hodi fahe ba voluntáriu sira hanorin, livru 2.000 rai iha Diresaun Nasionál Empregu no Exteriór (DNEE) hodi fó joven sira ne’ebé tuir kursu lian koreia no livru 2.000 seluk sei fó ba sentru formasaun privadu sira ne’ebé daudaun halo kooperasaun ho SEFOPE hodi hanorin lian Koreia.
Notísia relevante : SEFOPE loke inskrisaun kursu lian Koreia via online
Nia dehan, daudaun iha sentru formasaun privada hamutuk 30 ne’ebé halo kooperasaun ho SEFOPE hodi fó kursu lian Koreia ba joven sira.
“Ita haree sentru formasaun privada sira, maski halo ona esforsu maibé tanba sira privada sei menus fasilidade. Ho ida-ne’e ita hato’o preokupasaun sira ne’e ba Embaixadór Koreia Súl iha Timor-Leste hodi fó livru, nune’e ita bele apoia hodi fasilita joven sira ne’ebé ho inisiativa hakarak hatene lian Koreia atu bá serbisu,” nia akresenta.
Durante SEFOPE halo kooperasaun ho sentru privada sira, buka dalan hahú iha tinan 2019 ho objetivu timor-oan sira ne’ebé hakarak tuir kursu lian Koreia labele dependénsia de’it ba Korean Student Linguage Programme (CSLP) ne’ebé mak SEFOPE kontrata ajénsia sira fó formasaun lian Koreia nian ba joven sira.
“Entaun ha’u ko’alia ho Ministériu Traballu Koreia Súl nia reprezentante iha Timor atu ita buka dalan halo kooperasaun ho sentru formasaun privada sira hodi fó formasaun ba ita-nia joven sira, maski sira serbisu iha rai-li’ur maibé importante mak sira iha merkadu,” Diretór tenik.
Inisiativa ne’e hatudu katak SEFOPE hakarak valoriza sentru formasaun sira ne’ebé iha vontade maski sira ho inisiativa rasik, sira iha vontade prepara joven sira apreende lian Koreia atu kompete iha merkadu.
“Ita rekomenda ba IX Governu liuhosi Sekretáriu Estadu foun atu kontinua reforsa tan sentru formasaun privadu sira atubele fó formasaun nafatin ba joven sira bele hetan oportunidade no labele depende de’it ba sentru formasaun hosi SEFOPE,” nia fó hanoin.
Sentru formasaun privadu estabelesidu hamutuk 30 ne’ebé daudaun koopera ho SEFOPE barak mak iha Dili no seluk iha munisípiu Bobonaro, Ermera, Baucau, no Manufahi.
“Ba munisípiu sira ne’ebé seidauk, ita husu atu kontinua loke formasaun tanba Primeiru-Ministru daudaun nia diskursu foin lalais ne’e dehan sei reforsa programa Mobilidade Laborál, signifika polítikamente hakarak halo nafatin kooperasaun ho nasaun sira ne’ebé daudaun fó hela oportunidade, nune’e ita mós tenke prepara-an,” Diretór adianta.
Jornalista : Arminda Fonseca
Editora : Julia Chatarina
