DILI, 28 setembru 2021 (TATOLI)-–Sekretaria Estadu Formasaun Profisionál no Empregu (SEFOPE) hahú inskrisaun kursu lian Koreia via online.
“Hahú ohin reativa filafali kursu lian Koreia ba joven sira ne’ebé maka hakarak tuir kursu ne’e, maibé rejistu via online de’it,” Sekretáriu Estadu Formasaun Profisionál no Empregu, Alarico de Rosário, hateten iha salaun SEFOPE, Caicoli, tersa ne’e.
Tuir governante ne’e, razaun SEFOPE loke rejistu via online, atu kumpre nafatin protokolu saúde.
“Ita kumpre nafatin desizaun Governu atu evita ema labele mai dudu-malu no halibur ema barak iha prosesu inskrisaun,” Sekretáriu Estadu akresenta.
Kursu lian koreia durante fulan-neen hanesan kritéria ida ba traballadór timor-oan sira molok bá serbisu iha Koreia Súl.
Hafoin tuir kursu, tuir fali teste médiku no rejistu iha sistema baze dadus, no bainhira hetan ona kontratu sei tuir ezame médiku dala-ida tan, ne’ebé kuandu identifika saúde ladún di’ak labele kontinua.
Totál traballadór timor-oan iha Koreia Súl hamutuk 3.000 resin no 705 mak fila mai ona Timor-Leste, ne’ebé kuaze ho durasaun serbisu tinan-tolu to’o lima.
Jornalista : Natalino Costa
Editora : Julia Chatarina
