AINARO, 08 agostu 2023 (TATOLI)–Sekretáriu Estadu Kooperativa, Arsénio Pereira da Silva, hala’o vizita ba kooperativa kréditu uniaun Maubessi ‘Hanoin ba Futuru’, ne’ebé lokaliza iha postu administrativu Maubisse Vila, munisípiu Ainaro.
Iha biban ne’e, Prezidente kooperativa, Luciano Mendonça Nunes, relata ba Sekretáriu Estadu kona-ba atividade kooperativa.
“Kooperativa ne’e harii iha tinan 2013, iha ona kapitál hamutuk $414.000-resin hosi membru kooperativa hamutuk 1.132, kompostu hosi mane 467 no feto 665. Hosi totál osan ne’e ami fó ona empréstimu ba membru sira hamutuk $276.000-resin, osan ne’ebé iha kaixa hamutuk $67.000-resin, no iha banku $36.000-resin”, nia relata, kuarta ne’e.
Notísia relevante : SEKoop-FHM realiza feira hodi promove produtu kooperativa iha rejionál
Bainhira membru kooperativa sira foti osan hosi kooperativa sei aplika juru 3%. Osan ne’e hodi hala’o atividade negósiu kuda modo no selu oan sira-nia eskola.
Kooperativa ne’e antes hetan apoia fundu hamutuk $7.500, ami uza hodi harii edifísiu. Kooperativa ne’e antes ne’e serbisu hamutuk Kréditu Uniaun Foundation Austrália (KUFA).
Hafoin rona tiha lala’ok kooperativa nian, Sekretáriu Estadu Kooperativa, apresia tebes ho kooperativa lokál ne’e tanba iha ona kapitál boot no membru barak.
“Ha’u haree imi-nia kooperativa di’ak tebes no bele dehan avansadu ona, ein termu jestaun kapas tebes tanba imi bele jere kapitál ida ho di’ak to’o sai boot, ne’e tanba jestaun di’ak hosi lideransa sira, ne’ebé husu atu kontinua nafatin, aumenta tan membru, hasa’e tan kapitál para fó prosperidade ba membru sira, ida-ne’e mak importante tanba intensaun harii kooperativa mak serbisu hamutuk no fiar malu,” Sekretáriu Estadu hateten bainhira hala’o vizita ba Koperativa, tersa ne’e.
Nune’e, governante ne’e enkoraja nafatin atu kooperativa ne’e bele buras ba beibeik no promete sei apoia kooperativa hotu tuir nesesidade tuir kapasidade Sekretaria Estadu Kooperativa (SEKoop) rasik.
Jornalista : Antónia Gusmão
Editora : Julia Chatarina
