DILI, 15 agostu 2023 (TATOLI)—Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, simu vizita hosi Diretora Banku Dezenvolvimentu Aziátiku (ADB, sigla inglés) iha Timor-Leste, Stefania Dina, hamutuk ho nia ekipa.
Biban ne’e, parte rua diskute kona-ba programa importante hanesan nutrisaun no bee-moos, ne’ebé sei implementa iha munisípiu Manufahi, Viqueque no Lautém.
“Ligadu ho nutrisaun, ADB apoia tebes bazeia ba ideia hosi Vise Primeiru-Ministru nian katak sei halo planu integradu ida, hahú hosi nível suku hodi estrabelese koordenasaun di’ak implementa programa nutrisaun nian. ADB servisu ho parseiru dezenvolvimentu sira seluk atubele hamutuk iha apoia ne’e ba Governu besik liután,” Diretora Stefania hateten hafoin hasoru malu ho Vise Primeiru-Ministru Assanami, iha Palásiu Governu, tersa ne’e.
Diskute mós kona-ba bee-moos tanba nu’udar parte importante ida, liu-liu iha parte urbana nian.
“Ami fahe informasaun kona-ba apoia ADB nian iha parte bee-moos, haree mós iha munisípiu sira hanesan Manufahi, Viqueque no Lautém. Fahe mós informasaun oitoan kona-ba investimentu iha tempu mai nomós diskusaun ho Ministériu Finansa liu-liu haree ba Ainaro, Covalima no Bobonaro,” nia akresenta.
Notísia relevante : ADB kapasita funsionáriu INETL na’in-20 kona-ba dadus estatístika
ADB mós sei halo programa ida atu identifika prioridade sira hamutuk ho Governu atu hala’o planu investimentu iha futuru.
Biban hanesan, Vise Primeiru-Ministru, konsidera kombate má nutrisaun nu’udar asuntu importante ida, tanba ne’e Governu foku hodi tau importánsia.
“Ami diskute setór rua importante, kona-ba má nutrisaun ne’ebé akontese iha ita-nia rain a’as tebes no bee-moos, tanba ita ukun-an tinan 20-resin ona maibé ita la rezolve kestaun ne’e, osan ne’ebé mak aloka boot tebes, haree de’it iha Dili aloka millaun $127 ba bee-moos no millaun $50 ba Lautém, Manufahi no Viqueque”, nia tenik.
Governante ne’e rekoñese instalasaun bee-moos importante tebes iha área rurál sira.
“Bee ne’ebé instala ita bele hemu direta ona no ita husu katak padraun ne’e bee duni la’ós fízikamente ita haree bee ne’e moos hela maibé afinál sei iha foer iha laran. Tanba ne’e diskusaun ne’e di’ak tebes no husu atu utiliza osan ne’e ho didi’ak nune’e bele benefisia povu,” Assanami dehan.
Enkuantu, kona-ba má nutrisaun presiza aprosimasaun integradu hosi ministériu oioin, tanba Ministériu Agrikultura, Pekuária, Floresta no Peska nia funsaun maka oinsá hasa’e produsaun, Ministériu Edukasaun atu eduka ema hatene konsumu hahán ho nutrisaun. Ministériu Saúde responsabiliza liu ba inan isin-rua, feto, bebé. Tanba ne’e maka presiza nutrisaun ruma mak fó ba bebé sira dala ruma labarik kiik nia kabun kiik maibé nia presiza nutrisaun boot.
Nune’e, IX Governu hakarak iha aprosimasaun integradu no Governu tomak tenke unidu atubele halo servisu di’ak hodi hasai Timor-Leste hosi má nutrisaun.
Jornalista : Antónia Gusmão
Editora : Julia Chatarina
