KOVALIMA, 07 Jullu 2026 (TATOLI) – Servisu Rejistrasaun no Verifikasaun Emprezariál, Institutu Públiku (SERVE,I.P) Sukursal iha Kovalima hahú Janeiru to’o Juñu hasai lisensa 400 ba operadór ekonómiku sira ne’ebe hala’o sira nia atividade negosiu iha Kovalima.
“SERVE ,I.P hasai lisensa 400 ho nia tipu; renovasaun hamutuk 226, rejistu foun 106 no halo alterasaun hamutuk 68 ho nia atividade sira mak Enin, Unipesoal LDA, LDA no Sosiedade Anonima (SA) ida no reprezentante permanente hodi hala’o sira nia atividade ekonómiku”, Koordenadór SERVE I.P Sukursal Kovalima, Domingos Gavrila Amaral, relata dadus ne’e ba jornalista sira, iha Kampung Baru, ohin.
SERVE I.P Sukursal Kovalima arrekada ona reseita hamutuk 9,311 ba kofre Estadu. Reseita ne’ebé mak SERVE I.P kontribui mai husi rejistu foun empreza sira, renovasaun no halo alterasaun ba sira nia atividade ekonómiku .
SERVE I.P hala’o nia atividade hodi halo atendimentu, maibé hasoru mós dezafiu tanba laiha konsevadór nune’e tarde atu fó sai empreza sira nia lisensa no SERVE,I.P iha nasionál mak halo aprovasaun.
“Ita seidauk iha setorál no konservadór, nune’e bainhira halo atendimentu dokumentu , ita sei rai hela to’o fulan klaran ita foin lori ba nasionál hodi halo aprovasaun, nune’e ita tarde fó sai empreza sira-nia lisensa”, nia dehan.
SERVE I.P mós durante ne’e nota katak ba Empreza no negosiante-sira nia lisensa bainhira liu ona prazu, maibé la halo renovasaun, nune’e husu hakbesik mai iha SERVE, I.P hodi halo renovasaun labele hein AIFAESA halo inspesaun tiha mak foin halo renovasaun.
“Tanba bainhira lisensa liu ona prazu presiza halo renovasaun tanba lisensa sira liu prazu mak instituisaun reguladór sira bele aplika multa”, nia relata.
Jornalista:Celestina Teles
Editór:Florencio Miranda Ximenes
