DILI, 24 agostu 2023 (TATOLI) – Eskritór timoroan, Luís Cardoso ‘Takas’, manifesta nia vontade atu fó formasaun ba manorin sira hodi hasa’e sira-nian abilidade iha eskrita hodi bele hakerek istória luta rai ida ne’e nian.
Luís Cardoso hatudu nia prontidaun atu disponibiliza formasaun sobre hakerek, maibé planu ida ne’e tenke mai husi Ministériu Edukasaun.
“Importante liu maka tenke iha formasaun ida adekuada ba profesór sira. Hanesan timoroan ida ha’u prontu atu apoiu formasaun ba sira, maibé desizaun sira ne’e tenke iha planu Ministériu Edukasaun nian”, eskritór ne’e hatete iha Balide.
Bainhira iha ona desizaun ruma husi ministériu, nia sei halo planu ida di’ak atu prepara mós matéria balun relasiona ho formasaun sira, nune’e bele ajuda profesór sira-nian koñesimentu atu sai eskritór ida di’ak liu. Matéria sira ne’e relasiona ho literatura depois tenke rekolla dadus sira atu sai referénsia atubele hakerek.
Eskritór ne’e mós agradese ba Ministériu Edukasaun nia serbisu, tanba garante futuru nasaun nian hodi eduka labarik timoroan. “Tanba labarik ida atu hetan koñesimentu di’ak iha siénsia tenke mai husi edukasaun”, dehan.
Ministra Edukasaun, Dulce de Jesus, realsa Edukasaun simu eskritór timoroan ida ne’ebé hola parte iha luta libertasaun ba ukun rasik-an. Liuhusi nia matenek sira hodi hakerek livru barak kona-ba problema Timór no asuntu globál sira. Eskritór ne’e sai nu’udar premiadu ba literatura.
“Ami husi Ministériu Edukasaun sente orgullu tebes tanba eskritór Luís Cardoso bele mai vizita ami-nian fatin no bele mai ko’alia ho formadór sira iha INFORDEPE nune’e bele loke liután sira-nian hanoin hodi bele sai ema ne’ebé bele dezenvolve literatura Timór nian”, governante afirma.
Tuir Dulce de Jesus, literatura Timór foin maka verbál de’it tanba seidauk iha ema barak mak hakerek, maibé ho prezensa eskritór famozu ne’e bele motiva fali timoroan sira seluk, liuhusi Ministériu Edukasaun atubele prepara-an hodi sai mós hakerek-na’in ida di’ak ida iha país hodi hakerek fali asuntu importante sira ne’ebé akontese iha nasaun ne’e.
“Ha’u hein katak profesór no dirijente sira ne’ebé mak iha esperiénsia barak no loron ba loron iha ligasaun ho ensinu bele sai mós eskritór di’ak ida iha futuru hodi bele prepara ita-nian istória ho di’ak liután”, espera.
Luís Cardoso ‘Takas’ mai Timor-Leste tanba hetan konvite husi Prezidente Repúblika, José Ramos Horta, hodi fó kondekorasaun ba nia ho kolár Orden Timor-Leste, grau Medalla Onra nian, hanesan forma rekoñesimentu ba nia obra literária, nomós papél ne’ebé nia asume ba luta libertasaun nasionál.
Luís Cardoso vesedór Prémiu Oseanu 2021. Nia obra sira mak Crónica de Uma Travessia (1997); Olhos de Coruja; Olhos de Gato Bravo (2002), A Última Morte do Coronel Santiago (2003), Requiem para o Navegador Solitário (2007); O ano em que Pigafetta completou a circum-navegação (2013); Para onde vão os gatos quando morrem? (2017) no O Plantador de Abóboras (2021).
Notísia relevante: PR Horta kondekora eskritór Luís Cardoso ho Kolar Orden Timor-Leste
Jornalista: Tomé Amado
Editora: Maria Auxiliadora
