DILI, 07 setembru 2023 (TATOLI) — Uniaun Sidade Kapital Lian Portugés (UCCLA-sigla portugés), ne’ebé parseria ho Administrasaun Munisipiu Dili (AMD) no Asosiasaun Emprezariál Feto Timor-Leste (AEMTL), kinta-ne’e, lansa ona kompetisaun “Ideias-Dili Inovar” ba feto joven emprezariál sira.
Kompetisaun ne’e ho objetivu ba joven emprezáriu sira ho idade entre tinan 17-25, ne’ebé sira-nia aplikasaun individuál ka koletivu entre elementu tolu, ne’ebé hela iha Dili. Ne’ebé hakarak dezenvolve sira-nia atividade emprezariál inovativu iha kapitál.
Kompetisaun ne’e hetan finansiamentu husi Uniaun Europeia (UE, ho projetu “Partenaria ba Haforsa Governasaun Urbanu, Inkluzaun Sosiál no Promove Emprezaridade iha Dili, Timor-Leste,” ho montante millaun $3.
Embaixadór Uniaun Europeia, Marc Fiedrich, hateten katak kompetisaun ne’e ho objetivu atu enkoraja, inova no fó kbi’it ba feto sira atu dezenvolve atividade ekonómika sira hodi kontribui ba dezenvolvimentu iha Timor-Leste.
“Iha tempu ne’ebá, emprezáriu la’ós de’it atu kria kompañia. Ida ne’e kona-ba rezolve problema, dudu inovasaun no forma futuru ida-ne’ebé naroman liu no sustentável liu. Fó kbiit ba joven feto sira atu hala’o lideransa negósiu nian la’ós de’it hanesan imperativu sosiál ida, maibé hanesan objetivu ekonómia no dezenvolvimentu nian ne’ebé prioridade,” nia dehan iha serimónia ne’ebé hala’o iha Sentru Kulturál, Jorge Sampaio, iha Embaixada Portugal, iha Dili.
Reprezentante UCCLA, Raquel Carvalho, reforsa projetu ne’e ho objetivu atu promove feto emprezariál sira iha Dili, hodi enkoraja joven feto sira atu esplora oportunidade emprezariál sira, enkoraja joven feto Timor-oan sira atu reflete kona-ba konseitu emprezariál sira hodi hatán ba nesesidade merkadu sira.
“Nune’e mós estimula ekonomia lokál, iha ne’ebé kompetisaun tenke iha impaktu pozitivu ba kriasaun empreza foun no empregu sira, hodi tulun hasa’e kreximentu ekonómiku iha kapitál nasaun nian”, nia afirma.
“Kompetisaun “Ideias – Dili Inovar” foka liu ba kategoria tolu mak ambiente, turizmu (restaurante) no servisu, ne’ebé sei permite kandidatu sira atu esplora oportunidade negósiu no ajuda kria kompañia foun sira.
Ho kategoria dahuluk mak inklui ideia negósiu sira ne’ebé promove prátika responsável sira no konsidera prezervasaun no protesaun ba ambiente, kategoria turizmu no hahán inklui ideia negósiu sira iha área ospitalidade, hahán no bebidas.
Kategoria ikus mak kobre servisu oioin hanesan envolve servisu finanseiru, saúde, teknolojia informasaun no komunikasaun, konsultasaun, edukasaun, servisu transporte, apoiu sosiál no seluk tan.
Iha fatin hanesan, Prezidente Autoridade Munisipiu Dili, Guilhermina Saldanha, hateten kompetisaun ne’e hanesan oportunidade ida atu oferese fatin ba joven feto sira atu hatudu sira-nia talentu no kapasidade emprezariál ho ideia inovadór atu kria sira-nia negósiu.
“Inovasaun nu’udar fatór esensiál ida ba progresu no dezenvolvimentu iha kualkér área ka setór. Ida-ne’e fó dalan mai ita atu buka solusaun kreativu ba dezafiu sira ne’ebé ita hasoru no ajuda ita atu hetan futuru ne’ebé di’ak liu,” nia hateten.
Autoridade munisipál ne’e konsidera katak kompetisaun Dili-Inovar sei ajuda autoridade lokál atu identifika emprezáriu potensiál ho ideia inovadór sira, liuliu iha kapitál.
Biban ne’e, Prezidente autoridade ne’e apela ba joven feto sira atu koko haree mundu oin-oin no halo sira-nia negósiu iha dalan revolusionáriu.
Aplikasaun sira loke husi aban to’o loron 8 fulan-outubru no bele submete online iha www.facebook.com/ideias inovasaun ka liuhusi email: Ideias.dili.inovar@gmail.com. Aleinde ne’e, parte interesadu sira bele rejista diretamente iha fatin projetu nian iha sede Konsellu Sidade Dili.
Ideia negósiu ne’ebé inovativu liu ne’ebé hili ona iha faze selesaun dahuluk sei hetan formasaun teórika no prátika durante fulan haat, entre novembru 2023 no marsu 2024, husi AEMTL no Institutu Apoiu ba Dezenvolvimentu Emprezarial (IADE).
Selesaun ba ideia negósiu 20 ne’ebé promete liu sei hala’o husi loron 9 to’o loron 25 fulan-outubru no formasaun teórika no pratika sei hala’o husi loron 6 fulan-novembru to’o loron 15 fulan-marsu.
Iha abril 2024, kandidatu sira-ne’e sei hetan selesaun finál, hafoin aprezentasaun publika, sei hili planu negósiu neen ne’ebé di’ak liu atu hala’o projetu ne’e iha semestre segundu.
Enkuantu, Rezultadu sira-ne’e sei anunsia iha loron 26 abril 2024 no sei hahú husi loron 13 maiu to’o 31 dezembru 2024.
Aplikasaun sira ne’ebé hili ona iha faze dahuluk hodi aprezenta sira-nia planu negósiu sei iha tablet no sertifikadu partisipasaun ne’ebé disponivél tuir aplikasaun.
Entretantu, aplikasaun neen ne’ebé hili ona iha faze daruak sei hetan benefísiu husi insentivu ida atu implementa ideia negósiu nian, ho totál montante ne’ebé aloka ona ba manán na’in neen mak rihun $90, ne’ebé sei dezembolsa iha faze tuir planu ne’ebé atu define iha faze monitorizasaun implementasaun ne’ebé planeia ona.
Notísia relevante: UCCLA-AMD-AEMTL asina MoU promove emprezaria feto
Jornalista: Osória Marques
Editór : Florencio Miranda Ximenes
