DILI, 01 Jullu 2026 (TATOLI) – Ekipa Nasionál Noruega konsege kualifika ba faze 16 hafoin manán Kosta Marfim ho rezultadu 2-1 iha jogu intensa ida ba jornada 32 Kopa Mundiál 2026, ne’ebé hala’o iha Estádiu Dallas, Arlington, kuarta madrugada oras Timor-Leste nian.
Jogu nakloke ho ritmu maka’as
Dezde minutu dahuluk, nasaun rua troka atake ho intensidade aas, uza téknika no abilidade individuál hodi buka golu sedu ka fura guarda-redes.
Noruega maka domina liu no la fó espasu ba Kosta Marfim. Minutu rua (2) nia laran, Erling Haaland fó ona sinál perigu. Nia suta forte maibé hetan blokeiu hosi defeza adversáriu.
Kosta Marfim responde, maibé ladún konsistente. To’o ba hydration break dahuluk, sira halo tentativa rua, maibé laiha ida-ne’ebé diretamente ba alvu.
Haaland insiste no Nusa marka
Minutu 36, Haaland halo ameasa ho kabesa. Guarda-rede Yahia Fofana salva ho reflesu di’ak. Maibé minutu 39, Noruega hetan vantajen 1-0. Antonio Nusa finaliza ho suta kolokadu ba kantu dook ne’ebé Fofana la konsege alkansa.
Minutu 41, Haaland besik atu duplika vantajen. Nia hodi kabesa, maibé Fofana salva tan dala ida. Kosta Marfim la konsege fó resposta to’o intervalu, no Noruega ba deskansa ho 1-0.
Kosta Marfim empata, maibé Haaland deside
Fila husi intervalu, Kosta Marfim aumenta presaun. To’o ba hydration break daruak, sira rejista tentativa haat, maibé defeza noruegués sei metin.
Minutu 74, Kosta Marfim konsege empata 1-1. Amad Diallo tama iha kaixa penalidade no suta kruzadu ne’ebé liu guarda-rede Ørjan Nyland.
Alegria Kosta Marfim la naruk. Minutu 86, Haaland deside jogu. Hafoin simu pasa matadalan husi Patrick Berg, jogadór Manchester City ne’e ho kalma hatama bola ba rede: 2-1 ba Noruega.
Pontuasaun ne’e mantein to’o apitu finál. Ho vitória ne’e, Noruega avansa ba oitavu finál no sei hasoru Brazil, “Samba”
Alineasaun Sira
Kosta Marfim (4-3-3): Yahia Fofana; Guéla Doué, Oumar Diakité Agbadou, Wilfried Singo Kossounou, Ghislain Konan; Ibrahim Sangaré, Franck Kessié, Jean-Evrard Kouassi Oulai; Jérémie Boga Diomande, Nicolas Pépé; Simon Adingra Bonny.
Noruega (4-3-3): Ørjan Nyland; Marcus Pedersen, Kristoffer Ajer, Colin Rösler Heggem, David Møller Wolfe; Sander Aursnes, Patrick Berg, Martin Ødegaard; Antonio Nusa, Erling Haaland, Alexander Sørloth.
Jornalista: Hortêncio Sanchez
Editór: Rafael Ximenes de A. Belo
