COVALIMA, 20 setembru 2023 (TATOLI)–Ministériu Solidariedade Sosiál no Inkluzaun liuhosi Sentru Solidariedade Sosiál no Inkluzaun (CSSI, sigla portugés) Covalima, halo reajustamentu dadus benefisiáriu programa bolsa da mãe kondisionál iha munisípiu Covalima.
“Polítika implementa programa bolsa da mãe kondisionál tinan lima (5) tenke halo reajustamentu. Tanba impaktu hosi COVID-19 ita la konsege halo reajustamentu, nune’e semana oin sei halo reajustamentu ba benefisiáriu bolsa da mãe kondisionál,” Pontu Fokál CSSI Covalima, Nelson de Jesus, hateten ba Agência Tatoli, iha nia kna’ar fatin Suai Loro, kuarta ne’e.
Nia hateten, Governu seidauk halo pagamentu ba programa bolsa da mãe kondisionál tanba seidauk halo reajustamentu dadus ba benefisiáriu bolsa da mãe kondisionál
“Durante ita seidauk halo reajustamentu ne’ebé hala’o reajustamentu iha 2017, durante tinan hirak nia laran, ita la halo reajustamentu tanba impaktu hosi COVID-19, ita la realiza reajustamentu,” nia hateten.
Tuir Governu nia polítika, benefisiáriu ne’ebé atu asesu bolsa da mãe kondisionál sei rejista labarik ho idade hahú 0-5 no ba estudante hahú tinan 7-17, no sistema sei esklui benefisiáriu sira-nia naran.
Kritériu atu asesu bolsa da mãe kondisionál presiza dokumentu-sira hanesan inan-aman sertidaun RDTL, Kartaun Eleitorál, Bilette Identidade (BI), labarik sira-nia sertidaun batizmu ka sertidaun RDTL ho fixa família.
Benfisiáriu ne’ebé nia inan-aman mate, CSSI Covalima iha mekanizmu ida, labarik nia inan-aman mate entaun presiza rejista ema-ne’ebé labarik sira hela hamutuk.
Tuir dadus ne’ebé iha, Sentru Solidariedade Sosiál no Inkluzaun (CSSI) Covalima ne’ebé sira-nia naran iha lista hamutuk 4,579 atu hala’o reajustamentu.
Jornalista : Celestina Teles
Editór : Cancio Ximenes
