BAUCAU, 27 setembru 2023 (TATOLI) – Reprezentante Povu hosi Parlamentu Nasionál liuhosi Komisuan D ne’ebé trata asuntu Ekonomia no Dezenvolvimentu sei hato’o relatóriu fiskalizasaun kona-bá problema tratór ne’ebé serbisu munisipál agrikultura Baucau hasoru ba Governu Sentrál.
Vise-Prezidente Komisaun D, Deputadu Manuel Hendrique Noronha, esplika, liuhosi sorumutu entre autoridade munisipál Baucau rona ona preokupasaun sira ligada ho limitasaun no tratór ne’ebé hetan estragu iha diresaun serbisu munisipál agrikultura.
“Ita sei husu ba ministériu relevante atu prevee osan ruma atubele rezolve problema ne’ebé serbisu munisipál agrikultura Baucau hasoru,” Vise-Prezidente Komisaun D iha Vila Nova, kuarta ne’e.
Reprezentante povu ne’e, konsidera probelema be’ebé hato’o hosi diresaun agrikultura nu’udar asuntu komún tanba tratór importante ba povu atu hadi’a kondisaun moris ekonomia, liuliu ba natar no to’os.
Nune’e, liuhosi preokupasaun ne’ebé hato’o, Komisaun D rejista no sei halo relatóriu nune’e bele hato’o direita ba ministériu agrikultura, peska, florestra atu buka solusaun.
Tratór iha serbisu munisipál agrikultór hetan estragu nune’e difikulta fila-rai agrikultór sira iha munisípiu Baucau.
Serbisu Munisipál Agrikultura Baucau atuál simu proposta hosi komunidade hosi postu administrativu sira hamutuk 600, maibé labele atu responde hotu tanba hasoru difikuldade kona-bá limitasaun tratór hodi fila-rai iha époka tinan-ne’e.
Diresaun agrikultura liuhosi departamentu mekanizasaun agrikultór Baucau kontinua hala’o manutensaun ba tratór hanesan troka ekipamentu sira, maibé seidauk kompleita mesmu ekipamentu fornese ona hosi nasionál.
Alende ne’e, orsamentu ba manutensaun tratór kada tinan sempre iha redusaun nune’e afeta ba prosesu manutensaun bainhira tratór hetan estragu iha situasaun emerjénsia.
Totál tékniku mekanizasaun iha Agrikultór Baucau hamutuk na’in-tolu no tratór hamutuk 14 komposta hosi tolu paradu no ida presiza hadi’a no hela ualu funsiona no iha faze manutensaun.
Jornalista : Natalino Belo
Editór : Evaristo Soares Martins
