DILI, 13 Outubru 2025 (TATOLI)–Federasaun Karate-do Timor-Leste (FKTL) konsidera atleta na’in-hitu prepara aan menus try out antes tuir kompetisaun SEA Games iha Thailándia.
Sekretáriu Jerál FKTL, António Carlos de Araújo esplika atleta na’in-hitu referidu oras ne’e konsentra hamutuk ona iha Otél Ramelau no kada loron hala’o treinu dala-rua iha-ne’ebé fasilidade hotu kona-ba alimentasaun prepara hotu husi Konfederasaun Desportiva Timor-Leste (CDTL-sigla portugeza).
“Karate ne’e la’ós kategoria modalidade terukur, tanba ne’e try out importante,” Sekretáriu Jerál FKTL informa ba TATOLI iha Jináziu, Segunda ne’e.
António Araújo hateten mezmu durasaun tempu ba preparasaun badak maibé atu preparadu liután atleta sira presiza try out hodi aumenta mentalidade inklui sai sasukat no bele halo avaliasaun téknika inklui tátika antes tuir kompetisaun másima maibé desizaun hotu iha CDTL.
FKTL iha responsabilidade ba atleta sira relasiona ho preparasaun treina ne’ebé akompaña husi treinadór na’in-tolu liuliu foku ba tèkniku, fíziku, sistema no estratéjia nune’e preparadu antes dezloka ba Thailándia.
“Ami rekomenda ona maibé tuir CDTL, ita menus orsamentu maibé agradese tanba ita-nia preparasaun la’o ho di’ak,” António Araújo akresenta.
Notísia relevante: Atleta nasionál hahú halo preparasaun ba Sea Games
FKTL hala’o selesaun ba atleta na’in-hitu ne’ebé sei kompete iha klase haat kompostu feto na’in-tolu hanesan Dalia kategoria menus husi kilógrama 50, Maria kategoria kilógrama 55, Livania kategoria kilógrama 61.
Atleta mane na’in-haat kompostu Imanuel kategoria 55, Júlio Kevin kilógrama 60, Bartolomeu kategoria kilógrama 65 no Deonisio iha kategiria 75.
Entretantu, SEA Games tinan-2025 ba dala-33 sei hala’o iha Thailándia husi loron-03 to’o 20 fulan-Dezembru iha-ne’ebé tuir planu Timor-Leste sei partisipa ho modalidade desportu hamutuk lima hanesan Atletizmu, Karate-do, Taekwondo, Boxe no Futeból.
Jornalista: Natalino Belo
Editór: Xisto Freitas da Piedade
