DILI, 06 Outubru 2025 (TATOLI)—Atleta nasionál husi modalidade lima hahú halo preparasaun hodi kompete iha Southeast Asian Games (SEA Games) ba dala-XXXIII iha Thailándia.
Governu liuhosi Ministériu Juventude, Desportu, Arte no Kultura (MJDAK) lansa sentru treinamentu ba atleta hirak-ne’e hodi hala’o treinamentu kompostu husi modalidade Taekwondo, Boxing, Atletizmu, Karate-do no Futeból ne’ebé fatin konsentrasaun iha Otél Ramelau.
“Governu nia meta klara. Maske tempu badak, ami espera katak pelumenus ita bele hetan medalla tolu iha SEA Games nian,” Ministru Juventude, Desportu, Arte no Kultura, Nelyo Isaac Sarmento hateten liuhosi komunikadu ne’ebé TATOLI asesu, Segunda ne’e.
Notísia relevante: Governu koordena ho CDTL-CONTL finaliza preparativu atleta ba SEA Games
Durasaun atleta nasionál sira halo preparasaun fulan rua-resin ho totál orsamentu hamutuk rihun $245 no sei dezkola ba Thailándia hodi tuir kompetisaun SEA Games iha 09-20 Dezembru 2025.
Entretantu, totál atleta nasionál ne’ebé halo preparasaun hamutuk na’in-74 husi modalidade lima kompostu Atletizmu na’in hitu, Boxe ho kategoria sanulu, Taekwondo na’in-sia, Karate-do hitu no Futeból hamutuk jogadór na’in-20.
Aleinde ne’e, modalidade desportu lima ne’ebé Timor-Leste iha sei akompañadu husi pesoál ofisiál no treinadór na’in-21, nune’e totál delegasaun ne’ebé sei partisipa iha Sea Games hamutuk 74.
Jornalista: Natalino Belo
Editór: Xisto Freitas da Piedade
