DILI, 12 Setembru 2025 (TATOLI)—Governu liuhusi Ministériu Juventude, Desportu, Arte no Kultura (MJDAK) hamutuk ho Diresaun Jerál Desportu (DJD) halo reuniaun ho Konfederasaun Desportiva Timor-Leste (CDTL, sigla portugés) no Komité Olimpiku Nasionál Timor-Leste (CONTL, sigla portugés) hodi koordena malu kona-ba preparativu atleta sira ba SEA Games iha Tailándia, iha fulan-Dezembru 2025 mai ne’e.
Reuniaun ne’e lídera husi Diretór Jerál Desportu João Rodrigues no akompaña husi Diretór Nasionál Desportu Federadu (DNDF), Oscar Quintas, ne’e deside ona atu apoia modalidade lima (5) mak hanesan Atletizmu, Taekwondo, Karate-Do, Boxe no Futeból.
“Enkontru ida-ne’e nu’udar pasu ida-ne’ebé pozitivu tebes, diskusaun entre Komité Olimpiku, Federasaun sira, no Governu liuhusi MJDAK nia rezultadu iha ona desizaun importante rua,” Prezidente CDTL, Macario Sanches, hateten liuhusi nota ne’ebé TATOLI asesu, sesta ne’e.
Nia esplika, desizaun rua ne’ebé deside mak define númeru modalidade ne’ebé Governu apoia no aumenta númeru atleta ba modalidade ida-idak, atu nune’e sira bele hahú kedas sira-nia preparasaun.
Ba modalidade Atletizmu, aumenta husi na’in-lima (5) ba na’in-hitu (7), Boxe aumenta husi kategoria hitu (7) ba kategoria sanulu (10), Taekwondo aumenta husi na’in-hitu (7) ba na’in-sia (9), Karate nafatin ho na’in-hitu (7), Futeból nafatin ho atleta na’in-20 inklui ofisiál na’in-lima (5).
Totál kontinjente ne’ebé sei reprezenta Timor-Leste iha kompetisaun ne’e hamutuk atleta na’in- 73.
Macario Sanches hatutan, númeru ne’ebé fiksa ona laiha tan selesaun no signifika atleta sira ne’ebé define ona sei tama kedas ba faze preparasaun, tanba tempu ba preparasaun agora menus ona husi loron 90.
Nune’e, nia mós husu ba atleta sira la’ós de’it ba partisipa maibé tenke kompete ho kualidade aas atu nune’e bele hatudu Timor-Leste preparadu duni ba jogu.
“Federasaun Internasionál balun finansia direta modalidade balun, no CDTL la iha problema ho ida-ne’e tanba ne’e fó oportunidade ba federasaun sira-ne’ebé la tama iha lista Governu nian,” nia dehan.
TATOLI
