Aplikante 12.851 ba vaga membru Polísia liu iha selesaun dokumentu
DILI, 02 Outubru 2025 (TATOLI)—Komisaun Rekrutamentu ba membru Polísia Nasionál Timor-Leste (PNTL) 2025 fó sai rezultadu selesaun dokumentu, ne’ebé iha aplikante hamutuk 12.851 admitidu.
Portavós Komisaun Rekrutamentu, Superintendente Polísia, António da Luz informa, Komisaun rejista katak dokumentu husi kandidatu sira ne’ebé submete husi Pontu Fokál ba Sekretariadu Komisaun Rekrutamentu, nune’e rejista konkorrente 13.770, kompostu husi mane 10.255 feto 3.515.
“Hafoin Komisaun halo verifikasaun ba dokumentu sira ne’e, husi totál kandidatu sira ne’ebé submete dokumentu no to’o ikus mai hetan kandidatu admitidu hamutuk 12.851, kompostu husi mane 9.529 no feto 3.322 liu selesaun dokumentu,” Portavós hato’o ba Jornalista sira liuhusi konferénsia imprensa, iha Sentru Formasaun Polísia, Komoro, Kinta ne’e.
Notísia relevante : Komisaun rekrutamentu rejista ona kandidatu asesu formuláriu 14.595
Sekretariadu Rekrutamentu bainhira halo verifikasaun, rejista aplikante 919 kompostu husi mane 726 no feto 193 la admitidu iha faze ne’e.
Biban ne’e, Portavós husu ba aplikante ne’ebé la admitidu iha selesaun dokumentu, atubele hato’o reklamasaun dentru loron-lima, nune’e parte komisaun bele klarifika.
Nia esplika, tuir loloos ezame prova kulturál ne’e realiza iha loron 05 Outobru, maibé tanba prosesu verifikasaun persiza tempu, tanba ne’e maka ekipa juri ba konkursu ida-ne’e deside realiza fali iha loron 12 Outobru 2025.
Nune’e, Komisaun Rekrutamentu husu ba kandidatu admitidu atu tuir teste eskrita ka prova kulturál iha loron 12 Outobru tuir oráriu iha tuku 07:00 to’o 08:00 dadeer iha ona fatin ezame nian.
Iha tuku 08:30 kandidatu hotu sei simu instrusaun kona-ba preparasaun ezame no iha tuku 09:45 kandidatu sira tama ona ba sala aula ezame no tuku 10:00 distribui matéria ezame no tuku 10:30 ezame la’o.
Portavós Komisaun Rekrutamentu ba membru PNTL foun ne’e mós fó sai fatin sira ne’ebé deside ona ba realizasaun prova kulturál iha kada munisípiu sira inklui iha Dili. Fatin hirak ne’e iha eskola sekundária sira iha kada munisípiu no iha Dili mak hanesan :
- Iha Munisípiu Aileu fatin ezame iha Eskola Sekundária Tékniku Vokasionál (ESTV) Aileu Villa no ESGAM Aileu.
- Ainaru ezame iha Eskola Báziku Sentrál (EBC) Venancio Fraz.
- Ataúru ezame sei hala’o iha Eskola Sekundária Jerál (ESJ) 99.
- Baukau iha ESJ nú.02 Villa Nova.
- Bononaru sei realiza ezame iha ESJ Dom Martinho da Costa Lopes Maliana,
- Kovalima nian sei hala’o iha ESGB-Serankotek-Suai.
- Dili sei realiza ezame iha edifísiu Komisaun Funsaun Públika (CFP), EBC 30 de Agusto, 5 Komoro, ESTV Bekora, ESTV 28 Novembru Bekora.
- Ermera sei realiza ezame iha ESJ Nino Koni Santa no Sekundária 10 de Abríl Ermera.
- Lautein iha ESJ Nino Konis Santana.
- Likisá sei realiza ezame iha Ensinu Báziku nú.01.
- Manatutu iha ESJ Kay Rala ho Eskola Públika Beadi.
- Manufahi iha ESJ 1912,
- Oekusi iha EBC + EBF 1 de Maiu Balapan.
- Vikeke iha ESJ 04 Setembru no Ensinu Báziku 01 Beloi.
Enkuantu, materiál ne’ebé kandidatu sira lori tuir ba ezame maka Kartun Eleitorál orijinál, Bilhete de Identidade orijinál, lapis 2B no lapizeira kór azul inklui pagadór, regua sirkulu no aviadór.
“Husu ba kandidatu sira, aban bele bá idaidak ninia munisípiu hodi haree naran no kandidatu sira ne’ebé rejistu iha CFP, bele mai iha CFP no sira ne’ebé rejistu iha Komandu Jerál PNTL bele ba haree naran iha ne’ebá,” Portavós katak.
Antes ne, iha loron 05 Fevereiru 2025, Ministru Interiór, Francisco da Costa Guterres, aprezenta projetu rezolusaun ida iha reuniaun Konsellu Ministru, kona-ba define nesesidade rekrutamentu ba membru PNTL iha tinan 2025 no autorizasaun ba abertura konkursu públiku ba admisaun iha Kursu Formasaun Ajente no Kursu Formasaun Ofisiál, ne’ebé diploma ne’e hetan aprovasaun.
Nune’e, PNTL tinan ne’e loke vaga ba membru foun hamutuk na’in-500, ne’ebé 400 sei tama iha Kursu Formasaun Ajente no 100 iha Kursu Formasaun Ofisiál.
Jornalista : Natalino Costa
Editora : Julia Chatarina
