DILI, 12 Agostu 2025 (TATOLI)-Portavós komisaun rekrutamentu membru foun ba Polísia Nasionál Timor-Leste (PNTL), Superintendente António da Luz, informa hahú loron 05 to’o 11 Agostu 2025 kandidatu ne’ebé asesu ona formuláriu hamutuk 14.595.
“Kandidatu ne’ebé asesu ona formuláriu membru polísia foun hamutuk 14.595, mane hamutuk 1.919 no feto 3.676”, António hatete ba jornalista sira iha Sentru Formasaun Polísia Komoro, tersa-ne’e.
Da Luz mós anúnsia regra teste nian ba kandidatu polísia foun 2025 nian bazeia ba diploma ministeriál nu.17/2025 iha artigu 29, 30, 31 mak hanesan aplika prova ba selesaun lima; 1) mak ezame eskrita ba prova kulturál, 2) mak prova aptidaun fízika, no 3) prova psikolojia (iha prova eskrita no psikomotoris) depois sira liu-hotu mak 4) entervista profisionál no 5) ikus liu mak prova médika.
“Selesaun sira ne’e hotu mak sei-nia prosesu eliminatóriu. Katak, nia bele pasa iha prova kulturál, maibé mai iha prova fízika mak la-liu, entaun la-liu hotu ona”, esklarese.
Nia hatutan katak, métodu teste kona-bá matéria tuir iha artigu 30 hateten, persiza fó sai matéria ba kandidatu sira, nune’e bele prepara no estuda. Matéria sira mak lian-tetun, portugés, istória, jeografia, matemátika, ikus liu mak konstituisaun RDTL.
“Matéria sira ne’e mak sei sai iha ezame prova kulturál, ida ne’e tenki fó sai ba publiku para kandidatu sira bele estuda, hodi halo preparasaun”, katak nia.
Nune’e mos iha artigu 31 kona-ba prova aptidaun fízika ba mane mak fleksaun ho liman ba trave (tara-an), ba feto mak estensaun liman ba rai leten (push up), fleksaun iha ai-rin ba feto no mane, halai minute 12 ba feto metru, ba mane metru 2200. Anexu V mak hanesan la’o iha portiku leten, saltu ka haksoit morru ba mane 0,90 sentimetru, feto 0,70 sentimetru.
“Depois iha prosesu ezersísiu fíziku ne’e aplika sistema eliminatóriu, por-ezemplu nia pasa iha faze ida tara-án up, mais nia siit-up la-liu ne’e elimina kedas, nia liu full-up no siit-up, maibé faze tuir mai nia la pasa elimina kedas”, esplika tan.
Nia hatutan liu tan katak, kuandu kandidatu ne’e liu kriteriu haat ne’e mak to’o ikus la-liu, elimina. “Hotu-hotu sistema eliminatóriu, laiha akumulativu”.
Portavós husu ba kandidatu sira atu estuda, halo preparasaun tuir faze teste sira.
Notísia relevante: Parlamentu husu rekrutamentu ba membru foun PNTL fó kuota 30% ba feto
Jornalista : Natalino Costa
Editora : Rita Almeida
