VIQUEQUE, 09 novembru 2023 (TATOLI)—Komisáriu Komisaun Nasionál Eleisaun (CNE, sigla portugés) destakadu munisípiu Viqueque, Olávio da Costa Monteiro Almeida, husu líder komunitáriu sira hodi organiza di’ak eleisaun órgaun suku ba segunda volta.
“Eleisaun suku segunda volta atu susesu ka la susesu ne’e iha xefe suku atuál no membru konsellu suku sira-nia liman. Ha’u husu autoridade lokál sira hotu tenke organiza ida-idak ninia eleitór hodi partisipa iha eleisaun hodi ita fó susesu ba eleisaun segunda volta ne’ebé sei akontese iha loron 13 novembru 2023, iha munisípiu Viqueque,” Olávio da Costa, hateten, durante atividade evaluasaun eleisaun órgaun suku iha salaun administrativu Uatulari, kinta ne’e.
Tanba ne’e, CNE halo koordenasaun ho Autoridade lokál sira hodi prepara-an ba eleisaun segunda volta.
Nia husu atu kandidatu xefe suku ne’ebé pasa ba eleisaun segunda volta tenke kolabora di’ak ho parte responsável sira nune’e eleisaun bele la’o ho di’ak.
“Ita-nia objetivu mak hakarak eleisaun la’o ho susesu, nune’e bele sai sasukat ba estabilidade no dezenvolvimentu iha Timor-Leste. Maski iha eleisaun suku ne’e ita laiha observadór internasionál, maibé ohin loron ema fasil asesu ita-nia informasaun,” nia hato’o.
Notísia relevante : CNE fó edukasaun sívika ba eleitór-sira iha Viqueque
CNE hamutuk ho Autoridade komunitária sira halo preparasaun ba eleisaun suku segunda volta tuir lei númeru 09/2016 Eleisaun Suku.
Iha postu Uatulari suku lima maka pasa ba eleisaun segunda volta ho totál kandidatu na’in-10, ne’ebé kada suku iha kandidatu na’in-rua mak kompete, postu Uatucarbau iha suku haat maka pasa ho kandidatura na’in-ualu, ne’ebé kada suku iha kandidatu rua ne’ebé sei kompete.
Iha fatin hanesan, Administradór postu Uatucarbau, Alfredo do Santos, apresia ho vontade CNE ne’ebé ho vontade kontinua konvoka Autoridade lokál sira halo preparasaun ba eleisaun segunda volta.
“Ami agradese ba CNE tanba bele kontinua konvoka autoridade sira hodi halo evaluasaun ba eleisaun órgaun segunda volta ne’ebé sei realiza iha semana oin. Ami autoridade lokál postu Uatucarbau sei garante eleisaun bele hetan susesu,” nia tenik.
Nune’e mós, Administradór postu Uatulari, Manuel do Rosário, konsidera, eleisaun órgain suku nu’udar festa família atu serví malu ne’ebé Estadu husik hela mai ita.
“Kandidatu ba xefe suku atu serví povu la’ós sai liurai ba povu. Husu ba kandidatu Xefe suku sira iha postu Uatulari, bainhira la liu barreira eleisaun, tenke serbisu kolabora malu ho Xefe suku eleitu,” nia fó hanoin.
Atividade ne’e partisipa hosi Autoridade lokál, Ofisiál Supervisaun no funsionáriu CNE Viqueque inklui Autoridade lokál sira iha postu Uatulari no postu Uatucarbau.
Jornalista : Vitorino Lopes da Costa
Editora : Julia Chatarina
