VIQUEQUE, 14 novembru 2023 (TATOLI)—Munisípiu Viqueque sei selebra loron ai-han mundiál liuhosi realiza atividade espozisaun ne’ebé fó prioridade ba produtu lokál ortikultura inklui kompetisaun kulinária.
“Hahú aban, ami halo preparasaun hodi deside selebrasaun loron ai-han mundiál, ne’ebé kada tinan ita sempre selebra, maibé tinan-rua ba kotuk ita la selebra tanba laiha orsamentu. Tinan ida-ne’e, ami hetan orsamentu hodi selebra, planeia ona atu realiza espozisaun ba produtu lokál no kompetisaun ai-han nutritivu,” Diretór Servisu Alimentár munisípiu Viqueque, Adelino Gusmão, informa ba Agência Tatoli, iha postu Uatulari, tersa ne’e.
Notísia relevante : Juventude Viqueque realiza espozisaun iha ámbitu selebrasaun Masakre Santa Cruz
Atividade ne’e atu promove produtu lokál sira, liu-liu ai-han nutritivu ne’ebé eziste iha munisípiu Viqueque hodi ema bele koñese.
“Ami inisia hakarak loke espozisaun ne’e tanba ita hakarak promove produtu lokál ne’ebé ho nutritivu atu nune’e ema bele koñese hahán sira ne’ebé iha nutritivu. Ami sei realiza espozisaun ba loron-ida, maibé daudaun ami seidauk deside loron realizasaun, dalaruma sei realiza iha semana oin,” nia akresenta.
Governu liuhosi Ministériu Agrikultura apoia fundu $3.500 hodi realiza eventu espozisaun, ne’ebé sei aprezenta atividade tolu hanesan produtu lokál, marsa saudável no kompetisaun kulinária.
“Ha’u hakarak husu ba grupu agrikultura sira hodi aprezenta produtu lokál hanesan modo, fehuk, fore-mungu no produtu sira seluk iha espozisaun no tuir kompetisaun kulinária ne’ebé sei realiza munisípiu Viqueque,” nia hato’o.
Jornalista : Vitorino Lopes da Costa
Editora : Julia Chatarina
