COVALIMA, 29 novembru 2023 (TATOLI) – Servisu Munisipál Agrikultura Covalima (SMAC) distribui, iha outubru, fini batar sele no noi-mutin hamutuk tonelada hitu ba agrikultór sira iha postu administrativu hitu iha munisípiu refere.
“Kada postu administrativu distribui fini batar tonelada ida”, Diretór SMAC, Reinaldo da Cruz, informa iha nia serbisu fatin Tabakolot, ohin.
Ba distribuisaun faze dahuluk Servisu Agrikultura distribui ona fini batar tonelada hitu no daruak sei fahe tonelada rua ne’ebé diresaun nasionál prepara hafoin bele distribui tan ba agrikultór sira. Mekanizmu fahe fini ne’e ba grupu nomós ba agrikultór individuál ne’e depende ba toos nia luan. Kada ektare hetan fini kilograma 15.
Aleinde fini batar, sei distribui mós fini hare ho tipu nakroma ne’ebé nia stock iha tonelada 25 ne’ebé agrikultór sira kuda iha postu administrativu Zumalai no Suai.
Tuir dadus 2023, agrikultór Covalima hasa’e produsaun área kultivu ba batar hamutuk 3.637 ektare no kada ektare hetan tonelada 2,15. Ba produsaun hare, nia área kultivu 2.093 no kada ektare hetan tonelada 3,2. Fore-mungu nia área kultivu 964.35 no kada ektare atinje tonelada 0.9. Ba Fore-rai nia área kultivu 265.27 no kada ektare hetan tonelada 0.5.
Jornalista: Celestina Teles
Editora: Maria Auxiliadora
