DILI, 08 janeiru 2024 (TATOLI) – Korresaun ba enunsiadu ezame ba kandidatu estudante rejime espesiál asesu ba Universidade Nasionál Timor Lorosa’e (UNTL) no Institutu Politékniku Betanu (IPB) hahú ohin no Ministru Ensinu Superiór, Siénsia no Kultura (MESSK), José Honório Jerónimo, husu ekipa téknika sira atu serbisu ho rigór no transparente, nune’e labale hamosu irregularidade.
“Ita halo ona abertura ba korresaun pontu ezame ne’ebé maka estudante rejime espesiál sira hamutuk 2.740 realiza ona. espera katak iha korresaun ne’e ekipa téknika sira sei serbisu ho responsabilidade atu laiha irregularidade ruma akontese iha prosesu ne’e”, José Honório hatete iha serimónia abertura korresaun ba enusiadu ezame ne’ebé hala’o iha salaun MESSK, Colmera, ohin.
Preokupasaun ministru nian husu ba ekipa sira atu serbisu ho rigór, tanba iha pasadu públiku kestiona kona-ba prosesu asesu ba UNTL no IPB. Tanba ne’e nia lakohi atu akontese tan iha tinan ida ne’e no solisita ba ekipa atu fó atensaun ba korresaun enusiadu ezame, nune’e bele fó fali konfiansa husi públika ba ministériu.
“Ha’u orienta ona ekipa téknika sira ne’ebé serbisu iha Komisaun Asesu ba Ensinu Superiór (KAES) atu hasa’e valór ba estudante rejime espesiál asesu ba UNTL no IPB mínimu 46 ba to’o 70, siginfika estudante sira ne’ebé maka ninia valór la to’o 46 labele asesu ba instituisaun ensinu superiór rua ne’e. Nune’e mós ba estudante medisina sira hakarak ka lakohi tenke hetan valór 55 ba leten maka foin bele tama ba UNTL”, informa.
Ministériu iha ona polítika ida atu aposta ba kualidade iha futuru, nune’e sé maka hakarak tama ba UNTL no IPB tenke iha valór di’ak. “Tékniku sira tenke kmprimenta ba regra, nune’e jerasaun foun sira ne’ebé asesu ba instituisaun Estadu rua ne’e merese duni bazeia ba sira-nian abilidade no koñesimentu tanba valór ne’e prienxe duni kritériu ne’ebé ministériu hasai”.
Diretora-Jerál MESSK, Maria Filomena Lay, espera katak prosesu hotu sei la’o di’ak no sei hatudu rezultadu adekuadu hodi bele hetan liután konfiansa husi públiku, liuliu estudante sira ne’ebé maka sei asesu ba instituisaun rua ne’e.
“Ha’u mós iha esperansa boot katak prosesu korresaun ne’e sei la’o ho rigor, maibé sé maka komete irrregularidade ruma, ministru iha kompeténsia submete ba regra Komisaun Funsaun Públika nian”, katak.
Iha sorin seluk, Reitór UNTL, João Soares Martins, hateten universidade aprezenta proposta hodi husu totál estudante 4.720 ne’ebé sei fahe ba fakuldade 10 no kursu 43.
“Ami espera katak númeru ne’ebé ami hato’o mak ne’e ona, signifika labele iha tan mudansa atu amuneta tan númeru mai UNTL, tanba ami-ninia kondisaun sira bele simu de’it tuir dadus ne’ebé maka ami submete ona ba ministériu”, realsa.
Notísia relevante: Korresaun ezame ba kandidatu rejime espesiál komesa iha semana oin
Jornalista: Tomé Amado
Editora: Maria Auxiliadora
