iklan

EDUKASAUN, HEADLINE

Korresaun ezame ba kandidatu rejime espesiál komesa iha semana oin

Korresaun ezame ba kandidatu rejime espesiál komesa iha semana oin

Universidade Nacional Timor Lorosa'e (UNTL). Imajen Tatoli/Francisco Sony.

DILI, 04 janeiru 2024 (TATOLI) –Komisaun Asesu ba Ensinu Superiór (KAES) sei halo korresaun, iha prosíma segunda-feira, ba enunsiadu ezame ba kandidatu estudante rejime espesiál ba Universidade Nasionál Timor Lorosa’e (UNTL) no Institutu Politékniku Betano (IPB) hamutuk 2.740.

Diretór Nasionál Ensinu Superiór husi Ministériu Ensinu Superiór, Siénsia no Kultura (MESSK), Higino Alves, dehan husi totál estudante ne’ebé realiza ona ezame ne’e kompostu husi rejime oportunidade na’in-845, rejime veteranu nia oan 247, rejime hakbiit 1.636, sub rejime 23 iha 11, no rejime diplomata nia oan ida.

Ba rejime alta desportiva, ofisiál Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), joven ho difisiénsia seidauk inklui iha dadus refere. Sira sei larealiza ezame, maibé submete de’it dokumentu maka komisaun halo selesaun no sei fó sai rezultadu iha tempu badak.

Totál estudante ba tinan akadémiku 2023/2024 nian ne’ebe maka atu asesu ba UNTL no IPB hamutuk 5.120 kompostu husi 4.720 ba UNTL no IPB 400.

Atu asesu ba instituisaun rua ne’e liuhusi serbisu konjuntu ne’ebé mai husi Ministériu Ensinu Superiór, UNTL no IPB nomós KAES. Komisaun ne’e halo ona serbisu hahú halo preparativu ba elaborasaun pontu ezame, halo impresaun, halo rejistrasaun, realiza ezame ba estudante sira no taka ho korresaun pontu ezame sira ne’ebé tuir planu sei hahú iha 08 janeiru.

Prosesu atu tama ba UNTL no IPB ne’e iha ona rejime rua maka estabelese mak espesiál no jerál. Ba rejime espesial kontein sub rejime sia mak oportunidade, hakbiit, veteranu nia oan, pesoál PNTL, F-FDTL, alta desportivu, estudante internasionál, joven ho defisiénsia no diplomata sira nia oan. Ba rejime jerál mak ba estudante sira ne’ebé maka foin akaba sira-nian estudu iha ensinu sekundáriu.

Notísia relevante: Finalista sira iha Covalima realiza teste eskrita asesu ba UNTL no IPB

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!