COVALIMA, 12 dezembru 2023 (TATOLI) – Estudante finalista na’in-124 iha Covalima realiza ona teste eskrita asesu ba iha Universidade Nasionál Timor-Leste (UNTL) no Institutu Politékniku Betanu (IPB).
“Ita fó ezame eskrita ba estudante finalista tinan 2019 to’o 2022 ne’ebé hakarak kontinua sira-nian estudu iha Universidade Nasionál Timor Lorosa’e no Institutu Politékniku Betanu. Ezame eskrita ba estudante finalista ne’e durante loron tolu ne’ebé hahú iha 12 to’o 14 dezembru”, koordenadora ekipa ba realizasaun ezame, Florentina Guterres, dehan iha Eskola Bázika Sentrál Ladi, ohin.
Iha loron dahuluk, finalista husi Siénsia Téknolojia hamutuk na’in-54 maka realiza ezame no na’in-10 mak falta, maibé nafatin fó oportunidade ba sira. Iha loron tuirmai, estudante Siénsia Sosiál Umanitária na’in-36 sei tuir ezame no, iha loron ikus, finalista 24 husi Eskola Tékniku Vokasionál mak realiza ezame.
Finalista sira ne’e fahe ba rejime espesiál, hakbiit no bolsa veteranu no martir nia oan no rejime jerál hodi haree ba valór estudante sira depende ba kursu ne’ebé sira hili no ba estudante finalista atu asesu rejime oportunidade, sé de’it bele tuir bazeia ba ekipa sira rejistu.
Rezultadu teste ne’e sei publika iha nasionál ba finalista ne’ebé pasa iha ezame eskrita hodi kontinua estudu iha UNTL no IPB.
Notísia relevante: Estudante finalista 123 iha Covalima sei asesu ba UNTL-IPB
Jornalista: Celestina Teles
Editora: Maria Auxiliadora
