COVALIMA, 21 novembru 2023 (TATOLI) – Ministériu Ensinu Superiór, Siénsia no Kultura (MESSK) no Edukasaun Covalima rejista estudante finalista 124 mak sei asesu ba Universidade Nasionál Timor Lorosa’e (UNTL) no Institutu Politékniku Betanu (IPB).
Xefe ekipa téknika Rejistu Edukasaun Covalima, João Martins, informa estudante finalista ne’ebé atu tama ba instituisaun rua ne’e mai husi Siénsia Teknolojia iha na’in-64, Siénsia Sosiál Umanitária 36 no husi Eskola Tékniku Vokasionál 24.
“Estudante finalista na’in-124 ne’e, 120 maka atu asesu ba Universidade Nasionál Timor Lorosa’e, na’in-tolu ba Institutu Politékniku Betanu”, dehan.
Nia salienta katak prosesu inskrisaun ba estudante finalista ne’ebé atu asesu ba UNTL ho IPB hahú iha loron 06 no remata iha 10 novembru.
Durante halo inskrisaun, hafahe ba rejime espesiál hakbiit (ba oan-ki’ak) no veteranu no mártir nia oan no rejime jerál hodi haree ba valór estudante finalista no kursu ne’ebé sira hili.
Kritéria ba estudante finalista ne’ebé atu asesu ba rejime hakbiit presiza lori dokumentu sira hanesan deklarasaun husi xefe suku hafoin lori bá Sentru Solidariedade Sosiál hodi hasai deklarasaun no diploma ensinu sekundáriu.
Ba estudante finalista atu asesu ba rejime oportunidade, sé de’it bele rejistu, maibé presiza lori dokumentu sira hanesan diploma ensinu sekundáriu no tekniku vokasionál, kartaun eleitorál, billeti identidade no sertidaun RDTL.
Ba veteranu no mártir nia oan sira presiza lori dokumentu sira hanesan deklarasaun husi konsellu veteranu munisipál no hasai fixa veteranu.
Estudante finalista sira ne’e depois rejista sei realiza teste iha loron 12 to’o 14 fulan-novembru.
Jornalista: Celestina Teles
Editora: Maria Auxiliadora
