DILI, 11 Juñu 2026 (TATOLI)–Tribunál Judisiál Primeira Instánsia Dili (TJPID) liuhusi despaisu iha prosesu primeiru interrogatóriu, Kinta ne’e, deside aplika medida Prizaun Preventiva ba arguidu na’in-rua ho inisiál JACR no MZX.
Arguidu na’in-rua submete mai Tribunál tanba alegadamente envolve iha krime tolu ne’ebé hadau karteira iha Praia Dos Coquiros hodi rezulta Nadine Ribeiro do Carmo lakon vida no Euodia Agile do Carmo hetan kanek, iha Domingu (07/06).
Arguidu na’in-rua nia hahalok rejista ho NUK 0602/26.PNSIK no Ministériu Públiku (MP) promove ho krime roubu ne’ebé previstu iha artigu 253, krime ofensa neglijente ne’ebé previstu iha artigu 148, no krime omesídiu neglijente ne’ebé previstu iha artigu 140 husi Kódigu Penál Timor Leste.
Iha Tribunál nia despaisu liuhusi Juíz Turnu Ivan Patrocenio, deside aplika medida Prizaun Preventiva ba arguidu na’in-rua tanba konsidera iha indísiu forte ba krime ne’ebé MP promove mai iha Tribunál.
Notísia relevante : MP prefere aplika Prizaun Preventiva ba arguidu hadau pasta rezulta Nadine lakon vida
Rekorda fali katak, iha alegasaun MP ne’ebé reprezenta husi Prokuradór Turnu Adérito Tilman husu ba Tribunál atu aplika medida Prizaun Preventiva ba arguidu na’in-rua.
Enkuantu, husi parte Defeza nian, Defensór Públiku Fernando de Carvalho husu Tribunál tetu atu aplika medida ba arguidu sira.
Prosesu primeiru interrogatóriu ne’e prezide husi Juíz Turnu Ivan Patrocenio, MP reprezenta husi Prokuradór Adérito Tilman, arguidu na’in-rua hetan asisténsia legál husi Defensór Públiku Fernando de Carvalho.
Hafoin desizaun ne’e, Polísia ezekuta despaixu Tribunál nian hodi lori arguidu na’in-rua bá estabelesimentu Prizionál Bekora hodi kumpre medida koasaun Prizaun Preventiva.
Jornalista : Natalino Costa
Editora : Julia Chatarina
