DILI, 08 janeiru 2024 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, hateten INSS liuhosi Banku Nasionál Komérsiu Timor-Leste (BNCTL-sigla portugés) halo ona pagamentu ba ferik-katuas no ema ho defisiénsia sira hamutuk 90.552 ho osan millaun $34.
“Ida-ne’e mak ita halo ona pagamentu ba sira no hosi ne’e ita seidauk simu relatóriu kona-ba hira mak mate, hira mak la simu hosi BNCTL,” nia dehan ba Agência Tatoli iha nia kna’ar fatin Caicoli, segunda ne’e.
Maibé, nia dehan, iha munisípiu balun mak seidauk simu tanba laiha kartaun identidade maibé Dili hotu-hotu simu ona tanba uza ATMT de’it.
Benefisiáriu sira-ne’ebé moras no balun la’o labele ne’e, ekipa BNCTL hamutuk ho xefe aldeia ka xefe suku hakat ba sira-nia fatin hodi selu direta iha sira-nia uma.
“Ita selu ba ema moras ne’e só iha dezembru de’it no janeiru ne’e laiha ona tanba ita prepara orsamentu ba 2024 nian,” nia hateten.
Pagamentu pensaun sosiál ba tinan 2024 ne’e, nia dehan, sei fahe ba kategória tolu ho nia valór pagamentu sei la hanesan bazeia ba kategoria idade mak idade 60-70 ho valór $60, idade 70-80 ho valór $80 no idade 80 ba leten ho nia valór $100.
Nune’e, tuir nia, orsamentu ne’ebé alokadu ba INSS menus tanba labele kobre hotu ba faze daruak nian.
“Ita iha ona orsamentu 2024 nian, nune’e ita fulan-juñu sei hahú halo pagamentu faze dahuluk nian. Maibé ita-nia orsamentu ne’e sei menus tanba konserteja dadus sei iha mudansa no mós osan. Agora osan ne’ebé aloka mai seguransa sosiál ne’e hamutuk millaun $74,” nia esplika.
Hosi osan ne’e fahe ba pensaun sosiál mak millaun $37, entaun labele selu ba idozu no invalidéz iha faze dahuluk no daruak nian tanba osan menus tebes.
Ba faze daruak nian, nia hateten, INSS sei husu aumenta ba IV Governu Konstitusionál hodi bele halo pagamentu.
“Ita sei husu tan Governu bainhira iha ona orsamentu retifikativu tanba ita hotu hatene katak Governu ida-ne’e fó atensaun makaas ba asuntu idozu no invalidéz,” nia dehan.
Jornalista : Osória Marques
Editór : Cancio Ximenes
