DILI, 01 Juñu 2026 (TATOLI) – Ministériu Edukasaun (ME) tenke halo investigasaun kle’an ba estudante balun ne’ebé deskonfia halo falsifikasaun ba diploma.
Deputada husi bankada Partidu Libertasaun Populár (PLP), Ermegilda Laurentina, hato’o sujestaun ne’e, iha ámbitu debate Orsamentu Retifikativu iha faze espesialidade iha Parlamentu Nasionál, ohin.
Nia husu ba Ministra Edukasaun atu fó esplikasaun kona-ba informasaun ne’ebé iha katak identifikasaun diploma falsu sekundária iha 11, ne’ebé rua husi munisípiu no sia iha Dili.
“Ha’u hanoin ministra tenke tau atensaun másima ba iha diploma ilegál sira ne’e, tanba ita ko’alia kona-ba edukasaun tenke mai husi ema ne’ebé kualidade hodi hanorin ita-nia oan sira ne’e bele sai di’ak para lori nasaun ne’e ba oin”, nia salienta.
Ministra Edukasaun, Dulçe de Jesus, dehan kona-ba diploma falsu agora ministériu kontinua verifika nia verasidade.
“Dokumentu sira tenke sai husi Ministériu Edukasaun. Konsege deteta [diploma falsu], iha situasaun ida -e’e talves akontese tempu barak ona, maibé desta vez ita konsege deteta situasaun ida-ne’e”, dehan.
Notísia relevante: http://Ministra Edukasaun seidauk simu informasaun estudante falsifika diploma –
Jornalista: Nelson de Sousa
Editora: Maria Auxiliadora
