VIQUEQUE, 11 janeiru 2024 (TATOLI)—Organizasaun Naun Govermentál, K’nua Haberan Komunidade (KHC) hosi munisípiu Viqueque, ne’ebé serbisu hamutuk ho Gabinete Apoiu Sosialedade Sivil (GASC), kinta ne’e, distribui ona fundu no fini modo ba grupu agrikultura rua iha postu Uatulari.
Grupu rua ne’e mak hanesan Grupu Hakbi’it Família hosi suku Uaitame no Grupu Luruboru hosi suku Macadique, ne’ebé kada grupu hetan $900 inklui modo musan hodi kuda.
Diretór Ezekutivu KHC, Agosto Pinto, hateten, fundu ida-ne’e hetan hosi Governu liuhosi GASC hodi apoia grupu sira-nia atividade, ne’ebé molok ne’e halo ona inspesaun direta ba Grupu Hakbi’it Família nia fatin halo atividade agrikultura.
“Nune’e, ohin ami distribui fundu no modo musan ba grupu rua hosi Luruboru no Uatame. Ba oin ami kontinua esforsu hodi ajuda atividade atu sira bele la’o ba oin,” Diretór informa iha sede grupu GHF, área Mauselok, suku Matahoi.
Notísia relevante : KHC loke kompetisaun diskursu públiku ba estudante Viqueque
Agosto Pinto husu atu grupu sira labele haree ba montante osan, maibé hanesan motivasaun hodi halo nafatin esforsu halo atividade agrikultura no bele fó empresta ba pesoál iha grupu laran.
“Grupu Luruboru maka la’o kleur ona, enkuantu Grupu Hakbi’it Família foin la’o tinan kotuk, maibé sira iha kompromisu atu la’o iha ne’e tanba ita haree sira hahú kria kolam, ortikultura no atividade rai no empresta osan. Nune’e, ha’u husu grupu sira labele hein de’it, maibé tenke esforsu husu ajuda ba ita-boot sira-nia atividade sira,” nia akresenta.
Diretór relata, antes ne’e KHC fasilita mós atividade formasaun ba membru grupu, kona-ba maneja hirus, agrikultura inklui rai no empresta.
Iha fatin hanesan, Administradór postu Uatulari, Manuel do Rosário, enkoraja grupu sira atu apoia malu nafatin hodi la’o ba oin tanba bainhira grupu ida la’o susesu sempre hasoru dezafiu oin-oin, nune’e tenke nafatin fuan boot hodi enfrenta situasaun saida de’it.
“Ha’u husu grupu rua ne’e tenke rona malu hodi lori grupu ne’e ba oin, tanba grupu atu la’o di’ak presiza rona malu no prontu hasoru dezafiu oin-oin. Ohin KHC fó ona apoia oituan, imi tenke la’o ba oin no labele kontente ba apoia sira-ne’e, maibé ita mós esforsu hodi haboot grupu no dezenvolve setór agrikultura sai boot liután,” nia hato’o.
Nune’e mós, reprezentante hosi grupu rua, Matias da Costa, apresia tanba ho apoia ida-ne’e bele reforsa grupu hodi hakiak ikan, ortikultura no atividade rai no empresta osan hodi bele sustenta família uma laran.
“Ami sente kontente no agradese ba organizasaun KHC ne’ebé apoia ona fundu no fini ba ami atubele uza ba nesesidade grupu. Ami sei jere fundu ida-ne’e tuir grupu ninia objetivu atu nune’e bele benefisia membru sira-ne’ebé envolve iha grupu laran,” nia realsa.
Jornalista : Vitorino Lopes da Costa
Editora : Julia Chatarina
