VIKEKE, 03 Jullu 2026 (TATOLI)—Konklui ona reabilitasaun Merkadu Munisipál Vikeke lokaliza área Olobai, Suku Karaubalu, Postu Vikeke Vila, Munisípiu Vikeke, tan ne’e autoridade planea sei muda negosiante sira iha fulan-Agustu 2026.
“Ita konstrui tiha Merkadu Olobai iha tinan hirak liubá, maibé la uza tanba kondisaun la sufisiénte, entaun negosiante sira la utiliza merkadu. Tan ne’e, iha tinan 2025 ita halo fali reabilitasaun no agora prosesu reabilita finaliza ona,” Francisco ba TATOLI iha Salaun Administrasaun Vikeke, Sesta ne’e.
Notísia relevante: Reabilitasaun merkadu Olobai konkluidu, tempu badak sei muda vendedór
Nia hateten autoridade munisipál sei muda negosiante sira ho di’ak, integridade no justu bazeia ba prosedimentu legál ne’ebé mak iha.
“Bainhira ita atu muda negosiante sira tenke bazeia ba lei, regulamentu no prosedimentu administrativu ne’ebé vigora, la’os tuir ita-nia hakarak. Ita tenke respeita enkuadramentu legál ne’ebé fó ba autoridade hodi halo ordenamentu merkadu,” nia tenik.
Iha fatin ketak, Reprezentante Diretór Jestaun Merkadu no Turizmu, Simões da Silva, tenik Diresaun Jestaun Merkadu no Turizmu Munisípiu Vikeke prepara ona termu referensia hodi forma ekipa ki’ik ida atu apoiu muda negosiante sira.
Merkadu Olobai reabilita ho orsamentu $273.951,88, responsabiliza husi empreza Caniela Unipessoal, Lda.
Tuir dadus, negosiante ne’ebé daudaun hala’o negósiu iha Merkadu Antigu Postu Vikeke Vila hamutuk 140.
Jornalista: Vitorino Lopes da Costa
Editór: Xisto Freitas da Piedade
