DILI, 15 janeiru 2024 (TATOLI) – Xefe Sentru Saúde, Postu Administrativu Turiscai, Munisípiu Manufahi João Martins Verdial, hateten suku 11, daudaun ne’e, iha Turiscai só suku tolu de’it mak iha ona Postu Saúde, maibé suku ualu seidauk iha Postu Saúde ne’ebé difikulta tebes ba komunidade sira atu halo tratamentu bainhira sofre moras.
“Iha Turiscai ita só iha de’it mak Postu Saúde tolu iha Suku Foholau, Liurai no Aitemua, seluk seidauk iha, kondisaun dalan la di’ak, entaun komunidade sira susar duni atu mai halo tratamentu iha Sentru Saúde Turiscai”, João dehan ba Agência TATOLI iha Turiscai foin lalais.
Nia dehan, Sentru Saúde iha planu atu vizita Postu Saúde no suku sira ne’ebé seidauk iha Postu Saúde ho fulan ida dala ida hodi halo tratamentu ba komunidade sira.
Suku ne’ebé seidauk iha Postu Saúde mak Matorek, Kaimauk, Manu-Mera, Mindelu, Fatukalu, Lesuata, Orana no Bermana.
“Ha’u hanoin vizita suku no Postu Saúde fulan ida dala ida-ne’e seidauk másimu tanba komunidade sira presiza tebes atu halo tratamentu, maibé ita-nia kondisaun mak nune’e, hanesan xefe ha’u tenke halo jestaun atu tuir kbiit ami nian”, xefe afirma.
Postu Saúde tolu iha Turiscai la destaka médiku, enfermeiru no parteira tanba rekursu limitadu ho nune’e pesoál saúde sira destaka de’it iha Sentru Saúde kada fulan mak tun ba komunidade hodi halo tratamentu.
“Ita-nia rekursu mak limitadu duni, ita labele husik hela Sentru Saúde mamuk, ita iha enfermeiru na’in lima, parteira tolu, doutór tolu, entaun ita labele destaka permanente iha Postu Saúde sira, sé sira-ba hotu iha postu mak Sentru Saúde mamuk”, nia salienta.
Nia refere, maske ho rekursu ne’ebé menus maibé la hamate pesoál saúde sira iha Turiscai nia vontade atu servisu hodi fó atendimentu ba públiku.
Iha sorin seluk, komunidade Manuel Soares da Costa hosi Suku Matorek husu ba Governu atu harii Postu Saúde iha sira nia suku atu bele fasilita komunidade sira halo tratamentu besik.
“Ami-nia suku mak dook liuhosi vila, tuir dalan ami hasoru mota boot tolu, bainhira udan makas ami labele ba konsulta tanba la’o ain kuaze kilometru hitu resin, iha tempu udan mak moras barak labele halo tratamentu, liuliu inan isin rua sira balun la’o ain partu de’it iha dalan, balun mate de’it iha dalan, nu’udar povu kiik ami husu ba Governu sé bele harii netik ami nia Postu Saúde ida tau doutór permanente hela iha ne’e”, komunidade Matorek kata.
Jornalista: Hortencio Sanchez
Editór : Zezito Silva
