DILI, 27 Outubru 2025 (TATOLI)—Ekipa AD SLB husi Laulara lidera tabela klasifikasaun primeira divizaun Liga Futeból Femininu Timor-Leste (LFFTL) jornada daruak hafoin manán Na’in-Feto FC ho skor boot 11-0 iha Estádiu Munisipál Dili, Domingu (26/10/2025).
Atualmente AD SLB lidera tabela klasifikasaun ho pontu neen (6), rezultadu husi manán rua (2), produtivudade golu 21. Enkuantu, Maudoko ne’ebé antes ne’e lidera iha pozisaun dahuluk, tun ba pozisaun dahaat, rezultadu husi manán ida (1) no impata ida (1).
Pozisaun daruak okupa husi Buibere FC ne’ebé rekolla pontu neen (6) ho produtividade golu 20, S’amuser FC okupa iha pozisaun datoluk ho pontu neen (6), husi rezultadu manán rua (2) no produtividade (+/-6).
Aleinde ne’e, Akadémika FC ne’ebé antes ne’e iha pozisaun 8 daualu, tenke okupa iha pozisaun dalimak hafoin manán Kulugisa ho skor 6-0, rezultadu husi produtividade golu 0, enkuantu Kulugisa iha pozisaun dasiak ho produtividade golu (-10).
VDL FC ne’ebé foin promovidu ba primeira divizaun tun eskada ida hodi okupa iha pozisaun daneen hafoin derrota ho Buibere 14-0, ekipa Maranatha mantein iha pozisaun dahitu ho pontu ida (1), rezultadu husi impata ida (1) no lakon ida (1).
Ekipa tolu mak to’o jornada daruak ramata seidauk gaña pontu iha tabela klasifikasaun ho pontu 0 hanesan UNITAL FC okupa iha pozisaun daualu, rezultadu derrota rua (2) ho produtividade menus golu (-10), Kulugisa iha pozisaun dasiak (9), rezultadu menus golu (-10) no Na’in-Feto FC iha pozisaun dasanuluk no sofre menus golu (-21).
Jornalista: Natalino Belo
Editór: Xisto Freitas da Piedade
