RAEOA sei dinamiza atividade oioin komemora 12 Novembru no loron Nasionál Juventude
OEKUSI, 10 Novembru 2026 (TATOLI) – Sentru Juventude Rejiaun Administrativa Espesiál Oekusi Ambeno (RAEOA), daudaun ne’e prepara ona atividade prinsipál lima ba komemorasaun loron akontesimentu Masakre Santa-Krús 12 Novembru no loron nasionál Juventude iha Oekusi.
Dionizio Taek, nu’udar responsavel Sentru Juventude Oekusi informa katak atividade prinsipál lima, aprovadu liuhusi reuniaun estabelesimentu komisaun organizadora.
“Iha Oekusi liuhusi Sentru Juventude, forma ona komisaun organizadora, ne’ebé iha atividade prinsipál lima, hanesan atividadade asaun sosiál hala’o limpeza jerál iha vila laran, dikursu públiku no diálogu, kalan reflesau,n misa no ikus sei kari ai-funan iha semitériu Santa-Roza,” nia hateten ba Ajénsia TATOLI,I.P iha sede suku Costa, ohin.
Nia informa, fundu ba utilizasaun loron Nasionál Juventude no selebrasaun Makakre 12 Novembru ne’e, Sentru Juventude Rejiaun Oekusi hetan apoia husi Ministériu Juventude Desportu, Arte no Kultura (MJDAK) hamutuk rihun $3.500, ne’ebé fahe ba sub-rejiaun haat, kada sub-rejiaun aloka $750.00
“Tanba komemorasaun konsentra iga kada sub-rejiaun idak-idak maibé hakbesik liu ba suku, hanesan iha Pante Makasar realiza iha sede suku Costa, Oésilo realiza iha sede suku Bobometo, Pássabe realiza iha sede suku Malelat no Nítibe realiza iha sede suku Bene-Ufe,” nia informa.
Notísia relevante:Xanana: Masakre Santa Krús hanorin katak ba interese nasionál presiza la’o hamutuk
Xefe Suku Costa Francisco Colo, nu’udar Prezidente Komisaun Organizadora, dadaun ne’e hala’o ona aviza iha dalan públiku, nune’e ema hotu bele partisipa iha loron istóriku ne’e.
“Ita hatene katak, loron 12 Novembru 1991 akontese masakre Santa Krús, joven barak mate iha iha loron ne’e, tanba ohin ita komesa fó sai ona aviza tuir dalan, atu husu sidadaun hotu, mai partisipa, halo reflesaun ba loron nasionál ne’e, tanba husi loron ne’e maka mundu hatene katak, Timor-Leste hakarak ukun rasik an,” nia hateten.
Notísia relevante:RAEOA enserra komemorasaun 12 Novembru ho misa no kari ai-funan iha semitériu
Entretantu, tema ba komemorasaun Masakre Santa Krús 12 Novembru 2026 ne’e maka, ‘Ho Espíritu 12 Novembru nian, Lori Ita Hamutuk ba Hari’i Dame no Autór ba Dezenvolvimentu Sustentavel’, ho nia sub-tema maka ‘Valoriza Unidade no Sakrifísiu Loriku Aas ua’in 12 Novembru hodi Hametin Istória liuhusi Asaun Karitativu hodi Hakat ba Futuru’.
Jornalista: Abílio Elo Nini
Editór: Rafael Ximenes de A. Belo
